Rusiye siyasiy sebeplerden 133 Ukraina vatandaşını taqip ete – Denisova
Ukraina Yuqarı Radasınıñ insan aqları vekâletlisi Lüdmila Denisova, bugünde-bugün Rusiye Federatsiyası siyasiy sebeplerden 133 Ukraina vatandaşını taqip ete, dep bildirdi. Şunı da qayd etti ki, dört aydan berli Rusiye Ombudsmeninden işğal etilgen Qırımğa barıp kelüvi ile bağlı cevapnı bekley.
Bu aqta Denisova "Qırım platforması: Qıırmnı işğalden azat etüv yolu" tögerek masa vaqtında haber etti.
"Bugünde-bugün RF siyasiy sebeplerden 133 Ukraina vatandaşını taqip ete. Olardan 114 qanunsız sürette apis etilgen. 15-i Qırımda ve 99-ı RF-da. Episi olıp 78 qırımtatar", - dep haber etti o.
Ombudsmen bu vatandaşlarnıñ çağına yetmegen balaları bar, bu 198 bala, dep qoştı.
Bundan ğayrı Denisovanıñ bildirgenine köre, Regional tiller ya da milliy azlıqlar tilleri Avropa hartiyasınıñ 8-nci maddesinde qayd etilgen ana tiilnde tasil alma aqqı bozula.
Malümat olaraq
- Denisova oktâbr ayından berli Rusiye Ombudsmeninden işğal etilgen Qırımğa barıp kelüvi ile bağlı cevapnı bekley.
- Denisova, Rusiye apishanelerinde tutulğan Qırım sakinleri tehdit etilgeni aqqında ayttı.
