Bunı “Qırım birdemligi” bildire. 

Qayd etilgeni kibi, mahküm etilgenler diplomatlarğa tutuv şaraitler aqqında tarif etip para yardımını aldılar.

Sergey Yürçenko, ziyaretten soñ şunı ayttı ki, Rustem Seytmemetov ve Osman Seytumerovnıñ doktorğa ihtiyacı bar, çünki közleri zayıf körmege başladılar. Erkekler, bunı kameradaki qaranlıqta oqumağa kerek olğan vesiqalarnıñ büyük sayısınen bağlaylar. Daa Osman Seytumerov, arqadaki ağrısına şikâyet ete, mabuslarnıñ tahminen episi, tışlerniñ alına şikâyet etken edi. Baş konsulığı, kerek olğan baquvınıñ keçirilmesine dair şefaatınen Rostov vilâyeti boyunca CEFH’ne muracaat etmege istey.

Bundan da ğayrı, mahküm etilgenler kosullarğa tutuv şaraitler aqqında tarif ettiler. Esasen suv bermemesi ve donuz etinen berilgen yemeklerge şikâyet eteler. Bunen beraber, alıp berüvler içün kameralarda buzdolabı yoq. TK tek Osman Seytumerovda bar. Taqiqat tevqifhanesinde tükân çalışa, amma mabuslarnıñ sözlerine köre, satılğan malnıñ çeşiti büyük degil. Konsullar, siyasiy mabuslarnıñ episi, uvut ayda para yardımını alacaqlarında inandıralar. 

Baş konsulı Taras Malışevskiy, Server Mustafayev, Seyran Saliyev ve Server Zekiryayevnen müessise memuriyetinen munasebetlerni müzakere etken. Server Mustafayev meselelerni hatırlağan: sefil yemekler, tükânnıñ qarışıq işi, muntazam tarzda olacaq kezintilerniñ yoq oluvı, nezaret etici organlarına şikâyetlerniñkeç qaluvları, kerek olğan tibbiy yardımınıñ alıp berüvinen qıyınlıqlar. 

Taras Malışevskiy vade etkeni kibi, müessise reberinen müzakere etecek ve tahqiqat tevqifhanelerde tutuv meselelerinde mütehassıs olğan yerli rostov uquq qoruyıcı teşkilâtlarnıñ advokatlarınen kelecek afta olarnıñ ziyareti aqqında añlaştı.

Belli olğanı

• Orta küz aynıñ 28 Rostov-na-Donudaki Cenübiy arbiy bölge makemesinde Bağçasaraydaki “üçünci Hizb ut-Tahrir gruppasınıñ” davasında üküm çıqardılar. Qırımnıñ dört sakini: Seytumer Seytumerov, Osman Seytumerov, Rustem Seitmemetov ve Amet Suleymanovnı 17, 14, 13 ve 12 yılğa azatlıqtan marum ettiler.  
• 2020 senesi saban aynıñ 11 Bağçasaraydaki işğal etilgen Qırımda Federal telükesizlik hızmetinen teşebbüs etilgen kütleviy tintüvlerden soñ er kes tutıp alınğan. Amet Suleymanovnı sağlıq alı sebebinden makeme ev tevqifine yolladı, başqalarnı tevqif ettiler. Qırımtatarlarnı 2003 seneden başlap Rusiyede yasaq olğan siyasiy islam fırqasına alâqadında qabaatladılar.
• 2021 senesi mayıs aynıñ 20 “Memorial” uquq qoruyıcı merkezi, davanıñ bütün iştirakçılarını mabuslar olaraq tanıp olarnıñ deral azat etilmesini istedi. 
• 2017 senesi orta küz aynıñ 11 Bağçasaraydaki FTH hadimleri 6 qırımtatarnı tutıp aldılar - Timur İbragimov, Marlen (Suleyman) Asanov, Memet Belâlov, Seyran Saliyev, Server Zekiryayev ve Ernes Ametovnı.
• İlk küz aynıñ 16 Rostov-na-Donudaki Cenübiy arbiy bölük makemesinde ekinci Bağçasaray gruppasına üküm çıqardılar. Qırımtatarlarnı 13-19 yılğa qadar azatlıqtan marum ettiler. Ernes Ametovnı aqlap makeme zalında azat ettiler.

Bizni Telegram’da oquñız