İştirakçiler plakatlar üstünde Qırımda ölgen üç yaşındaki Musa Suleymanovnıñ adını yazdılar. Böyle etip, faaller balanıñ qorantasına destek bildirdi. Oğlançıqnıñ babası ise Ruslan Suleymanov “Hizb ut-Tahrir davası” mabüsi tahqiqat tevqifhanesinde tutula. 

Aktsiya vaqtında faaller “Qırım- bu Ukrainadır” yazısınen bir duvarbez de açtılar. Faallerniñ añlatqanına köre, bu duvarbezni Halqara dostlar kününe Lübov Novoselskaya nğışlağan. 

"Strategiya-30" aktsiyasınıñ çerçivesinde Rusiye oppozitsiya faalleri ukrain siyasiy mabüslerine qoltutu aksiyalarını muntazaman keçire. Olar silâsız piket ve aktsiyalarğa çıqıp, siyasiy mabüslerniñ azat etilmesini, Ukrainağa qarşı tecavuznıñ toqtatılmasını ve Qırımnıñ işğalden boşatıluvını talap ete.

Malümat olaraq

• 2019 cenesi saban ayınıñ 27-nde FSB, Rusiye İç işler nazirligi ve Rusiye gvardiyasınıñ hadimleri Qırımda qırımtatarlarnıñ, şu cümleden "Qırım birdemligi" faalleriniñ evlerinde tintüvler keçirdi. Remzi Bekirov, Riza İzetov, Ruslan Suleymanov, Farid Bazarov ve Şaban Umerov Rusiye Ceza kodeksiniñ 205.5 maddesiniñ 1-inci qısmına (terror gruppasınıñ faaliyetini teşkil etüv) binaen qabaatlana. 
• Bala oraq ayınıñ 24-nde, evniñ yanında, Azatlıq soq., 8 adresi boyunca qum havuzında oynap tura edi. Soñki sefer onı aqşam saat altılarnıñ başında körgenler.
• Eki kün devam etken qıdıruvlarda işğal etilgen Qırımnıñ polisi, FVN, Rusiye gvardiyası, Tahqiqat komiteti ve göñülliler iştirak etti. 
• İşğalci içki işler nazirliginiñ malümatına köre, 3 yaşındaki Musa Suleymanov boğulıp öldi. 
• Oraq ayınıñ 25-nde Qırımnıñ işğal prokuraturası Rusiye Federatsiyası Ceza Qanunnamesiniñ 105 maddesine binaen cinayet davaını açtı (kiçik yaşlı balanı öldürüv).