Qırımnıñ işğal Fevqulade vaziyetler nazirliginiñ malümatına köre, Aqmescit tarafına ketken “Mersedes Sprinter” mikroavtobusı yerinde turğa “KAMAZ” avtomobilge barıp uruldı. Mikroavtobusnen 15 adam kete edi. 

“İlk malümatqa köre, “Tavrida” yolunda Aqmescit tarafına ketken “Mersedes Sprinter” mikroavtobusı yerinde turğa “KAMAZ” avtomobilge barıp uruldı. Mikroavtobusnen 15 adam kete edi. Yol qazası neticesinde sekiz adam öldi”, - yazıla bildirmede. 

“İnterfaks” Qırımnıñ işğalci ükümetine atfı etip, dört kişi Qarasuvbazar hastahanesine ketirildi, dep haber etti. Olarnıñ arasında bir kişiniñ alı pek ağır, daa üçüniñ alı bir qarar. Daa dört adam Aqmescit hastahanesine ketirildi, olarnıñ arasında biri öldi,  eki kişiniñ alı ağır, daa biriniñ alı bir qarar. 

Qırımnıñ işğalci  İİN bildirgenine köre, mikroavtobus aydavcısı öldi. Yol qazası sebeinden cinayet davası açılğan. 

“Aydavcı ve mikroavtobusnıñ yedi yolcusı öldi. Qaza yerinde Devlet avtomobil teftişi çalışa. Qırım Cumhuriyetinde İç işler nazirliginiñ tahqiqat idaresi tarafından Rusiye Ceza qanunnamesiniñ 264-nci maddesiniñ 5-nci qısmına binaen cinayet davası açıldı”, - qayd etile bildirmede. 

Qırımnıñ işğalci Naqliyat naziri Sergey Karpovnıñ bildirgenine köre, Krasnodardan Aqyarğa yol tutqan mikroavtobus aydavcısınıñ vesiqaları bile yoq edi. 

“İlk malmatqa köre, bu taşıyıcı qanunsız çalışa edi”, -dedi o.