Bu aqta Gemeci "Qırım birdemligi" cemaat birleşmesine bildirdi.

Lilâ Gemeciniñ aytqanına köre, Ruslan Suleymanov, cumaertesi künü, oraq ayınıñ 25-nde, oña qanun qoruyıcı organlarınıñ bir çoq hadimi keldi, dep ayttı. 

"Özüni tanıtmadılar, adiy urbada ediler, oña maneviy basqı yapıp, oğlunıñ yerini aytmağa talap ettiler. Hırsızlav versiyasını baqqanlar, onı Ruslan qanun qoruyıcı organlarğa tesir etmek içün teşkil etti dep tüşündiler. Boyle usullar iç kimsege qarşı qullanılmamalı", – dedi Gemeci.

Onıñ qayd etkenine köre, tahqiqat tevqifhanesiniñ reberliginden Ruslan Suleymanovnıñ oğlunıñ cenazesine yiberilmesine izin bermesini talap etmege tırıştı.

"Cenaze künü sabadan berli onı oğlunen vedalaşmağa yibersinler, cenazede olsun dep areket ettim. Yapamağan soñ evine keldim, tuvğanlarına, anası ve apayına haber etmek içün. Oğlançıq endi defin etilgen soñ, tahqiqat tevqifhanesine kirmege tırıştım. Tahqiqat tevqifhanesiniñ hadimleri añlayışnen yanaştı, Ruslannıñ balasına ne olğanını bile ediler ve bu haberni aytmağa imkân berdiler", – dedi Gemeci.

Rusiye quvetçileri advokatnıñ malümatını açıq şekilde izaatlamadılar.

Malümat olaraq

• 2019 cenesi saban ayınıñ 27-nde FSB, Rusiye İç işler nazirligi ve Rusiye gvardiyasınıñ hadimleri Qırımda qırımtatarlarnıñ, şu cümleden "Qırım birdemligi" faalleriniñ evlerinde tintüvler keçirdi. Remzi Bekirov, Riza İzetov, Ruslan Suleymanov, Farid Bazarov ve Şaban Umerov Rusiye Ceza kodeksiniñ 205.5 maddesiniñ 1-inci qısmına (terror gruppasınıñ faaliyetini teşkil etüv) binaen qabaatlana. 
• Bala oraq ayınıñ 24-nde, evniñ yanında, Azatlıq soq., 8 adresi boyunca qum havuzında oynap tura edi. Soñki sefer onı aqşam saat altılarnıñ başında körgenler.
• Eki kün devam etken qıdıruvlarda işğal etilgen Qırımnıñ polisi, FVN, Rusiye gvardiyası, Tahqiqat komiteti ve göñülliler iştirak etti. 
• İşğalci içki işler nazirliginiñ malümatına köre, 3 yaşındaki Musa Suleymanov boğulıp öldi. 
• Oraq ayınıñ 25-nde Qırımnıñ işğal prokuraturası Rusiye Federatsiyası Ceza Qanunnamesiniñ 105 maddesine binaen cinayet davaını açtı (kiçik yaşlı balanı öldürüv).