Almaniya Tış işler naziri Rusiyeniñ G7-ge qaytmasına qarşı çıqtı
Almaniya TİN başı Heiko Maas, Almaniya ukrain meselesi al etilmegence Rusiyeniñ “Büyük yedi devlet” gruppasınıñ oturışlarında iştirak etmesine qarşıdır, dep bildirdi.
Bu aqta, o, Rheinische Post neşrine berge intervyüde bildirdi, haber ete DW.
Heiko Maas qayd etti ki, Rusiyeniñ “Büyük yedi devlet” gruppasından uzaqlaştırılmasınıñ sebebi “Qırımnıñ işğali ve Ukraina şarqındaki çatışmağa kirişmeler” oldı. Ve onıñ fikrince bu meseleler al etilmegence, G7-ge onı qaytarmaq içün sebepler yoq.
Qırım meselesine kelgende, başta Ukraina şarqında vaziyetni çezmek kerek, ve tek bundan soñ Qırım meselesinen oğraşıp başlamaq kerek, dedi Almaniya diplomatı.
“21-nci asırda Avropada sıñırlar birisiniñ isteginen alıp deñiştirilgenini körmemezlikke urıp olamayıq”, - dedi o.
Almaniya TİN naziri qayd etkenine köre, Rusiye Suriye, Libiya ve Ukrainadaki çatışmalarnıñ al etilmesi içün kerek.
“Bu, Rusiyege qarşı degil, bu beraberlikte bir iş olacaq”, - dedi o.
Bundan ğayrı, nazirniñ aytqanına köre, evel ABD prezidenti teklif etkeni kibi G7-ni keñleştirmek keregi yoq.
“G7 ve G20 - bu eki aqıllı şekilde kelişilgen formatlar. G11 ya da G12 kerek degil”, -dedi o.
Malümat olaraq
- Donald Trump, Rusiye, İndistan, Avstraliya ve Şimaliy Koreyanı davet etip, “Büyük yedi devlet” gruppasını keñleştirmege teklif etti.
- Oraq ayınıñ 13-nde Avropa parlamenti tış işler komitetiniñ oturışında Almaniya TİN başı Heiko Maas, Rusiye ve Ukrainağa dair siyaset AB Şurasında Almaniyanıñ reisligi vaqtında esas olacaq, dep bildirdi.
- Amerika senatorları Rusiye Federatsiyasınıñ nevbetteki G7 sammitinde iştirak etmesine qarşı qarar teklif ettiler. Vesiqa Demokratik fırqasınıñ temsilcileri azırladı.