Böyle “habernamelerden” birini Facebookta Ukraina Tış işler naziriniñ birinci muavini Emine Ceppar yayınladı. 

“Qırımdan çıqqanlarğa böyle vesiqanı oqup bereler. Ekinci kere çıqıp olamacaqları aqqında haberdar eteler”, - yazdı Ceppar. 

“Habernamede”  qayd etile ki, memuriy sıñırdan keçken şahıs RF “toprağından” bir kere çıqıp ola, ekinci kere Ukrainağa ketecek olsa, red cevabı berilecek. 

Cepparnıñ yazısınıñ tübündeki tefsirler arasında, bu yanılıqnıñ tafsilâtları ve kimge ait olğanı aqqında qullanıcınıñ sualine Qırımda Ukraina prezidentiniñ daimiy temsilcisiniñ muavini Tamila Taşeva cevap berdi. 

“Saban ayınıñ 27-nde RF Ükümetniñ 763 nomeralı emri ile vaqtınca işğal etilgen topraqlardan avuşma yasaq etildi.  İstisna olaraq, bir kere avuşmağa izin berildi. Sıñırlavlar alâ daa lâğu etilmedi. Çiçek ayınıñ 29-nda RF ükümeti deñişmeler kirsetti, olarğa köre, Qırım mekân qaydınen Rusiye vatandaşlarına diger memleketiniñ vatandaşlığı olsa, avuşmağa izin bir kere berile”, - añlattı Taşeva.  

Malümat olaraq

• İşğalci Federal telükesizlik hızmetiniñ malümatına köre, endiden Qırım ile memuriy sıñırda ukrain pasportı maqbul degil. Bu, Qırım mekân qaydınen, amma Rusiye pasportı olmağan işğal etilgen yarımadanıñ sakinlerine ait.
• Ukrain sıñırcılarınıñ qayd etkenine köre, ukrainlerniñ muracaatları arasında eñ aktual bir sual, işğal etilgen Qırım ile memuriy sıñırdan keçüvdir.
• Ukraina Nazirler kabineti ükümetniñ nevbetten tış oturışında vaqtınca işğal etilgen Qırım ile memuriy sıñırda bütün kiriş-çıqış yoqlav keçitlerniñ işini yañartmağa qarar çıqardı. 
• Oraq ayınıñ 15-nden işğal etilgen yarımadağa Ukraina qıtasından kelgenler içün observatsiya lâğu etilecek. 
• Observatsiya lâğu etilgenine baqmadan, işğal etilgen Qırım ile memuriy sıñırnı keçken Ukraina vatandaşları içün sıñırlavlar devam ete.