Bu aqta Amesterdam istinaf mahkemesiniñ resmiy temsilcisi Melisa Zeylstra TASS Rusiye malümat agentligine bildirdi. 

Onıñ aytqanına köre, bu dava boyunca mahkeme qararı çıqarılacaq kün daa belli degil. Çünki ukrain tarafı bir mahkemeciniñ obyektivligini kene şübe altına attı ve mahkemeciniñ işten uzaqlaştırılmasını istedi. Söz mahkemeci D. Oranye aqqında kete. Bu mahkemeci keçken sene  "Promneftstroy" Rusiye şirketini mahkemede temsil etti. Bu davada, o, “skit altını” davasında Qırım müzeylerini temsil etken advokatlar Rob Meyyer ve Mariyel Köppenol-Lafors ile çalışqan edi. 

Mahkme temsilcisiniñ bildirgenine köre, mahkeme diñlevleri künü 2-3 aftadan soñ belli ola bile. 

Mahkemeciniñ davadan uzaqlaştırılmasını Amsterdam İstinaf mahkemesi baqacaq.

Malümat olaraq

• 500-den ziyade müzey eşyasından ibaret "Qırım: altın ve Qara deñizniñ sırları" sergisi 2014 senesi qara qış ayınıñ 19-nda Almaniyanıñ Bonn şeerindeki Reyn ülkeşınaslıq müzeyinde keçirilgen edi. Daa soñra Amsterdamdaki Allard Pierson arheologik müzeyinde açıldı. Sergi 2014 senesi kiçik aynıñ 7-nden arman ayınıñ 31-ne qadar devam etti, faqat Rusiyeniñ Qırım işğalinden sebep Qırım müzeylerine qaytıp olamadı.
• Qırımnıñ dört müzeyi eksponatlarnıñ qaytarıluvınen bağlı davanı Allard Pierson müzeyine qarşı açtırğan edi.
• Ukraina akimiyeti artefaktlar müzeylerniñ mülki degil, Ukraina devletine ait, dep bildirdi. Felemenk müzeyi qadı qararı olmağan soñ ya da taraflar añlaşqanına qadar eksponatlarnı bermemege qarar aldı.
• Amsterdamnıñ okrug mahkemesi 2016 senesi aralıq ayınıñ 14-nde "Qırım: altın ve Qara deñiz sırları" sergisiniñ eksponatlarını Ukraina devletine qaytarmağa qarar aldı.
• 2017 senesi saban ayınıñ 28-nde Amsterdamnıñ İstinaf mahkemesi Qırım müzeyleriniñ vekillerinden "skit altını" qararına qarşı temyiz arizasını aldı.
• Qırım müzeyleri saban ayınıñ 11-nde Amsterdam İstinaf mahkemesiniñ diñlevlerinen bağlı beyanatnı aydınlattı. Oña binaen, "ne Ukraina, ne Felemenk, ne de halqara uquq eksponatlarnı Kyivge bermek içün temel ola".