Bu aqta, o, Ukrainadaki Frenkistan elçisi Etyen de Ponsen ile körüşüv vaqtında bildirgen, dep haber ete TİN matbuat hızmeti. 

Emine Ceppar elçiniñ diqqatını, Frenkistan vatandaşlarınıñ Ukrainanıñ vaqtınca işğal etilgen topraqlarında Rusiyeniñ işğal başlıqları ile alâqalarına yol berilmemezligine çekti. 

Frenkistan elçisi öz nevbetinde, resmiy Parisnıñ Ukraina topraq bütünligine ve suverenitetine deñişmez mevamını tasdıqladı ve Emine Cepparnıñ muracaatını Frenkistan TİN bildirecegine inandırdı. 

Bundan ğayrı, Tış işler nizriniñ birici muavini, işğal etilgen Qırım, Aqyar şeeri ve Donbassta Rusiye Federatsiyasınıñ Anayasasına deñişmeler kirsetilüvinen bağlı rey berüv qanunsız olğanını qayd etti. 

Emine Ceppar ve Etyen de Ponsen, Rusiyeniñ tecavuziy areketlerine qarşılıq bildirmek içünişbirlik müim olğanını qayd ettiler. 

Bunıñnen beraberlikte olar, Qırımnıñ işğalden azat etilüvini, Ukrainanıñ vaqtınca işğal etilgen topraqlarında insan aqlarınıñ bozuluvlarını, Qara ve Azaq deñizlerinde telükesizlikniñ quvetleştirilüvini muzakere ettiler. 

Malümat olaraq

• Avropa Parlamentiniñ frenk millet vekillerinden ibaret delegatsiyası Rusiye Federatsiyasınıñ Anayasasına deñişmeler kirsetilüvinen bağlı qanunsız rey berüvni teşkermek içün üç künge işğal etilgen Yalta ve Aqmescitni ziyaret etecek olalar.
• Delegatsiyanıñ başında Avropa Parlamenti mebusı, tış işler komitetiniñ azası, “Frenkistan-Rusiye dialogı” Birleşmesiniñ prezidenti Tyerri Mariani olacaq. Ziyaretniñ maqsadı -   Rusiye Federatsiyasınıñ Anayasasına deñişmeler kirsetilüvinen bağlı qanunsız rey berüvni teşkerip, qıymet kesmektir. 
• 2016 senesi Qırım MC Prokuraturası Tyerri Mariani ve diger frenk mebusları işğal etilgen Qırımnı ziyaret etkenleri içün olarğa qarşı 331-1 maddesine binaen cinayet davasını açqan edi. 
• Ukraina TİN, çetel siyasetçilerniñ işğal etilgen Qırımğa barıp kelmeleri resmiy olmamağanını bildire.