İşğal etilgen Qırımda sanatoriylerge raatlanmağa kelgenler içün COVID-19 malümatnameleri lâğu etildi
Rospotrebnadzor, işğal etilgen Qırımda tibbiy litsenziyası olğan sanatoriya-kurort müessiseleriniñ işine dair talaplarnı yımşattı. Endiden, yerleşüv vaqtında musafirlerge koronavirusnıñ olmağanını tasdıqlağan malümatnameler kerek degil.
Bu aqta, Rospotrebnadhornıñ sanatoriya-kurort müessiseleriniñ işiniñ teşkili ile bağlı tevsiyelerine deñişmelernen vesiqada yazıla.
Aynı zamanda, turistler evelki 14 kün devamında hasta olğanlarnen alâqada olmağanlarını tasdıqlağan malümatnameni köstermeliler.
“Sanatoriya-kurort müessiselerine qabul etilgende raatlanğanlarğa, kerekli vesiqalardan ğayrı, tibbiy teşkilât tarafından yolğa çıqmazdan üç kün evel berilip, 14 kün devamında hasta olğanlarnen alâqada olmağanlarını tasdıqlağan malümatnameleri olmalı”, yazıla vesiqada.
Berilgen malümatqa köre, yerleşüv vaqtında turistlerniñ sıcağı ölçelenile, soñra künde bir kere. Qapalı odalarda, diger adamlar arasında bulunğanda mıtlaqa maska kiyilmeli.
Belli olğan malümat
- Kiraz ayınıñ 15-nden başlap, Qırım sakinleri ve Qırım mekân qaydınen olğanlar içün sanatoriyler, musafirhaneler çalışıp başladı.
- Oraq ayınıñ 1-nden başlap, sanatoriya-kurort müessiseleri Rusiyeden kelgenlerni de qabul etip olacaq.
