Qırım platforması yarımadasınıñ umumiy deokupatsiya strategiyasınıñ tışqı siyasiy qısmı olmaq kerek- Ceppar
Ukraina tışqı işler nazir muavini Emine Ceppar ilân etkeni kibi, Qırım platformasınıñ maqsadı-Qırım deokupatsiyası meselesinde halqara emekdeşliginiñ diqqatını ve resurslarnı birleştirmektir.
Bunıñ aqqında o, “Afta” ukrain neşriyatınıñ intervyüsinde tarif etti.
“Qırım platforması-yañı halqara koordinatsiya-mesleat formatıdır. Oıñ maqsadı-Qırımnıñ deokupatsiyası meselesinde halqara cemiyetiniñ diqqatını ve resurslarnı birleştirmektir. Yani Qırım platforması-strategiya, birleşme ve yardım manasına kele”,-tarif etti Ceppar.
Emine Cepparnıñ sözlerine köre, Qırım platforması, yarımadanıñ deokupatsiyası strategiyasınıñ tışqı siyasiy qısmı olmaq kerek, onıñ soñki maqsadı ise yarımada üzerinde Ukraina suverenitetiniñ qaytaruvı olmaq kerek.
Şimdi ise Platformanıñ faaliyeti beş esas yönelişinde toplanmaq kerek.
Qırım platforması öz işini beş esas yönelişi boyunca keçirecek
“Ukraina içün müim olğan ortaqlarınıñ episi, Qırım platformasınıñ teşkil etüv teşebbüsine qol tutıp sammitte iştirak etüv fırsatını muzakere eteler. Onıñ neticelerine köre, neticeli vesiqanı qabul etmege planlaştıramız. Yani, Ukrainanıñ territorial bütünligine ve mustaqiligine sammit iştirakçılarnıñ sadıqlığını tasdıqlaycaq olğan ve Qırımğa dair halqara siyasetini tayin etecek olğan hartiyanı”,-qayd etti nazir muavini.
Daa qayd etkeni kibi, bugün Ukrainanıñ ögünde, tek Qırımda öz suverenitetiniñ qaytaruvına dair degil, tamır halqalarnıñ medeniyet ve tillerniñ saqlanmasına ve aqlarnıñ qoruvına dair çoq vazifesi bar.
“Bu yıl, Qırım işğaline tirenüv künü uvutnıñ 26, prezident Zelenskiy müim bir qararını bergen. Uyğun emri, 2022-2032 senelerine qırımtatar tilniñ inkişaf strategiyasınıñ işlep çıqarılmasını köz ögünde tuta. Ukrainanıñ vaqtınca işğal etilgen territoriyalarnıñ reintegratsiya meseleler boyunca nazirligi, şimdi akimiyetniñ başqa organlarında kelişüvinde bulunğan qırımtatar tilniñ rağbetleştirüv ve inkişaf Qavrayışını azırlağan”,-yekün çekti Ceppar.
Belli olğanı
- Saban aynıñ 1 Ukraina tışqı işler nazir muavini Emine Ceppar, OSCE iştirakçı devletlerniñ vekilleri içün onlayn brifinginde iştirak etip Qırım platformasını taqdim etti.
- Qırımtatar halqnıñ Meclis baş muavini Gayana Yüksel ilân etkeni kibi, halqara cemiyeti, yarımadanıñ deokupatsiyası içün Qırım platformasından areketler planını bekley..
- 2021 senesi arman aynıñ 23 ötkerilecek olğan Qırım platformasınıñ teşkil etici sammitinde yarımada deokupatsiyasınıñ ukrain ve halqara planı taqdim etilecektir.
