SİZO-da tutulğan Bağçasaray "Hizb ut-Tahrir davası"nıñ mabüsi Bektemirov arqa ağrıları ve tiş problemlerinden aytına
Aqmescit tahqiqat tevqifhanesinde tutulğan Bağçasaray "Hizb ut-Tahrir davası"nıñ mabüsi Vadim Bektemirov arqa ağrıları ve tiş problemlerinden aytına. Al-azırda siyasiy mabüsniñ cinayet davasınıñ materiallarınen tanışuv yekünlenmekte ve o tezden Rostov-na-Donuğa etap etilecek.
Bunı "Qırım birdemligi"ne advokatlar haber ettiler.
"Advokat Edem Semedlâyevniñ aytqanına köre, Vadim Bektemirovnı, siyasiy mabüslerniñ çoqusını kibi tişleri raatsızlay, olar apishane şaraitinden daa beter ola, ve arqa ağrılarından aytına. Etap ve mahkeme oturuşı ile bağlı çoq sualleri bar, strategiyanı muzakere ettik", - dep yazıla bildirmede.
Aynı zamanda advokat, Bektemirovnıñ keyfi yahşıdır, dep ayttı.
Advokat Edem Semedlâyev ve Emil Kürbedinov SİZO-da tutulğan diger siyasiy mabüs Lenur Seydametovnen de körüştiler.
Seydametovnıñ advokatlarğa aytıp bergenine köre, onıñ kamerasında 10 adamğa 6 yataq ve anda pek suvuq. Amma buña baqmadan özüni yahşı duya – em maneviy, em beden ceetinden. Er keske selâmlar ayta ve destek içün minnetdarlıq bildire.
Malümat olaraq
- Lenur Seydametov 2021 senesi kiçik aynıñ 17-nde evinde keçirilgen tintüvden soñ yaqalanıldı. O RF CQ 205.5 maddesine binaen qabaatlana (terroristik teşkilâtnıñ teşkil etilmesi ve bu teşkilâtnıñ faaliyetinde iştirak etme).
- Vadim Bektemirov 2020 senesi oraq ayınıñ 7-nde yaqalanıldı. O, Rusiyede yasaq etilgen "Hizb ut-Tahrir" teşçkilâtınıñ faaliyetinden iştirak etüvnen qabaatlana.
