Avstriya işğal etilgen Aqyarda operanıñ quruluvında mimarlarınıñ iştirak etmesini tefsir etti
Avstriya, Rusiye tarafından Qırımnıñ qanunsız işğalini takbih etmege ve tanımama siyasetini, şu cümleden sanktsiyalarnı da desteklemege devam ete. Amma Avstriyanıñ Avropa, integratsiya ve tış işler federal nazirligi, AB-niñ yarımadanıñ işğaline qarşı sanktsiyaları "yalıñız bazı iqtisadiy faaliyentni yasaq ete, amma hususiy şirketlerniñ Qırım ile bütün iqtisadiy münsebetelrini degil", dep bildirdi.
Bunı kiçik aynıñ 21-nde "Ukrinform" agentligine Avstriyanıñ Avropa, integratsiya ve tış işler federal nazirligi bildirdi.
"Avstriya, Ukrainanıñ halqara seviyede tanılğan sıñırlarında mustaqilligini, suverenitetini ve topraq bütünligini destekley ve Qırım ve Aqyarnıñ qanunsız işğalini takbih ete. Avstriya muña ait AB-niñ tanımama siyasetini tam şekilde destekley, şu cümleden sanktsiyalarnı da ve olarğa riayet etmege tırışa", - Avstriyanıñ tış işler nazirligi Aqyarda operanıñ quruluvında mimarlarınıñ iştirak etmesini tefsir etti.
Aynı zamanda nazirlikte qayd ettiler ki, hususiy şirketlerniñ areketleri devlet faaliyeti degil ve bu sebepten tanımama siyasetini "bozıp olamay".
Malümat olaraq
- Avstriyada, işğal etilgen Qırımdaki leyhası içün mimarcılarğa qarşı davanı açmay ediler.
- Avstriya mimarlıq bürosı işğal etilgen Aqyarda opera tetrini quracaq ola. Ukraina sanktsiyalar azırlay.
- Keçken yılnıñ soñunda Coop Himmelblau viyana mimar bürosınıñ reberi Volf Priks APA avstriyalı malümat agentliginiñ tefsirinde bürosınıñ, Rusiyedeki eki leyhasında iştirak etüv faktını tasdıqladı: rusiye Kemerovodaki müzey-teatr kompleksiniñ quruvını ve işğal etilgen Aqyarda operanıñ quruvını.
