Bu aqta advokat Edem Semedlâyev "Qırım birdemligine" haber etti. 

Onıñ aytqanına köre, qırımtatarlar SİZO-da pek yaramay baquv şaraitine şikâyet eteler eken. 

"Eskender Abdulganiyevge kelgende, aralıq ayınıñ 4-nden berli alâ daa yorğan bermediler, qoluna tüşken şeylernen örtüle – kurtka ya da başqa urbalarnen, anda ise pek suvuq. Kamerada 4 kişi. Unitaz sınıq. Böyle şarait sebebinden kartserge avuştırılmasın istedi, amm oña red ettiler. Dediler ki, anda şarait yahşaca. Bu sebepten anda bile avuştırmaylar", - ded Semedlâyev. 

Siyasiy mabüsler ruhtan tüşmey ekenler, er keske büyük selâmlar aytalar ve mektüpler içün minnetdarlıq bildireler. 

Malümat olaraq

• Qasım ayınıñ 3-nde Rostov-na-Donudaki Cenübiy bölge arbiy mahkemesi Qurman “Hizb ut-Tahrir davası”nıñ üç mabüsine üküm çıqardı. 
• İmaye tarafı ve mahkemelengenler esnasqa uydurılğan deyler. Qabaatlav, telefon diñlemelerniñ materiallarına, gizli şaatlarnıñ aytqanlarına ve mabüslerniñ evlerinde tampılğan kitaplarğa esaslana.