Bu aqta Ukraina Tış işler nazirliginiñ beyanatında yazıla. 

Tış işler nazirliginiñ beyanatında añlatılğanını köre, mecburiy pasporlaştıruv - işğal şaraitinde yaşamağa mecbur olğan Ukraina vatandaşlarına dair tecavuzcı devletniñ basqıcı siyasetiniñ bir usuludır. 

Qayd etile ki, Qırımnı qanunsız işğal etip, Rusiye em ukrain, em halqara uquqnı qaba tarzda bozdı. 

Beyanatta yazıla: 2014 senesi çiçek ayınıñ 15-nde qabul etilgen “Ukrainanıñ vaqtınca işğal etilgen topraqlarında vatandaşlarnıñ aq ve serbestlikleriniñ ve uquq rejiminiñ temin etilmesi aqqındaki” qanunğa köre, Ukraina vaqtınca işğal etilgen topraqlarda yaşağan ukrainlerniñ Rusiye Federatsiyası vatandaşlığınıñ mecburiy avtomatik almasını tanımay ve bu Ukraina vatandaşlığından marum olmaq içün esas degil. 

Bundan ğayrı, 1907 senesi IV Gaaga Şartnamesinde tasdıqlanılğan 45 maddege binaen (Qara cenkiniñ qanunları ve adetleri aqqında nizamname), işğal etilgen topraqlarnıñ ealisini işğalci devletke sadıqlıqqa ant ettirmege ve vatandaşlağını deñiştirtmege yasaq etile. 

İşğal etilgen Qırım ve Aqyar şeerinde yaşağan Ukraina vatandaşları saylav aqqından marum etildi, Rusiye vatandaşlığından red etmek içün imkânlar ise yoq edi, demek mümkün. 

İşğalci devlet öyle bir şarait yarattı ki, Qırım MC ve Aqyar şeerinde yaşamaq içün Rusiye pasportlarını almamaq imkânsız oldı (bu tedaviylev, işke kirüv, oquv, pensiya ve ilâhre).

Bunıñnen beraberlikte, Rusiye pasportı olmağanı içün, adamlar mecburiy sürgün etile bile ve olarğa işğal etilgen yarımadağa kirmege yasaq etile bile edi. Ukraina vatandaşları Rusiye pasportlarını işğal etilgen Qırımda evlerini ve mal-mülküni saqlap qalmaq içün almağa mecbur ediler. 

“Yaqında RF prezidenti V. Putin Ukraina vatandaşalrınıñ işğal etilgen Qırımda topraq saibi olmağa aqqından marum etilüvi aqqında imzalağan fermanı - Rusiye vatandaşlığını aldırtmaq içün nevbetteki adımdır. Ukraina, Qırım MC ve Aqyar şeerinde yaşağan öz vatandaşlarınıñ aqlarını ve menafaatlarını qorçalacaq”, - yazıla beyanatta. 

Belli olğan malümat

• Kiraz ayınıñ 12-nde ukrain jurnalisti ve televizion alıp barıcısı Pavlo Kazarin onıñ Rusiye vatandaşılğı olğanı aqqında malümatnı tasdıqladı. Şimdi, o, Rusiye vatandaşlığından vazgeçecek ola. 
• Añlatqanına köre, o, işğal etilgen Qırımda qalacaq edi ve 2014 senesi saban ayınıñ soñunda pasport alğan. Amma Boing urup tüşürilgen ve Oleg Sentsov yaqalanılğan soñ andan köçmek kerek olalacağını añladı. 
• 2014 senesi ekin ayında Pavlo Kazarin Kıyivge köçip keldi.