Ukraina Yuqarı mahkemesi sabıq Qırım mebusı Ganişniñ ükmüni lâğu etti
16:34, 01 Aralıqay
Foto menbası: УНІАН
Ukraina Yuqarı mahkemesi Qırım Yuqarı Şurasınıñ sabıq mebusı Vasiliy Ganişniñ ükmüni lâğu etti. Evel o devlet hainligi içün 12 yıl apis cezasına mahküm etilgen edi. Aynı zamanda mahkeme davanı tekrar istinaf baquvğa qaytardı.
Bu aqta “RBK-Ukraina” neşrine Ganişniñ advokatı Andriy Rudenko haber etti.
“Bugun Yuqarı mahkeme temyiz talabımıznı baqtı, ükümni lâğu etti ve davanı tekrar istinaf baquvğa qaytardı”, - dedi o.
Mahkeme qararınıñ sebebini añlatmaqtan red etti.
Malümat olaraq
- Başlanğıç mahkeme Ganişni Ukraina topraq bütünligini bozğanınen qabaatlı tanıdı.
- Ganiş Ukraina qıtasında yaqalanıp apis cezasına mahküm etilgen yekâne qırım mebusıdır. Qarar quvetini 2020 senesi qara qış ayında aldı.
- Ekin ayınıñ 26-nda Jitomırnıñ Bogun rayon mahkemesi Ganişni müddetinden evel azat etti.
