Yedi yıldır arzu etkeniñni köresiñ - Seitablayev Qırım aqqındaki yañı VR-leyha aqqında
10:32, 30 Qasımay
Foto menbası: Ukrainer
Ukraina institutı Ukrainer ile beraberlikte “Tuvğan Qırım” virtual reallik (VR) formatında bir leyhanı başladı. Anda Qırımlılardan iştirak etkenlerden birincisi - qırımtatar rejissörı Ahtem Seitablayev oldı.
Bu aqta Ukraina institutı öz Facebook saifesinde haber etti.
“Bu super, ve ağrılı, ve inanılmazdır. Öyle is, sanki sen tüş köresiñ - yedi yıldır arzu etkeniñni köresiñ”, - dedi Seitablayev Qırımdaki tuvğan yerlerini virtual reallik formatında baqqan soñ.
Teşkilâtçılarnıñ bildirgenine köre, Qırımnıñ Rusiye tarafından işğali başlanğandan berli Ukraina qıtasına tahminen 45 biñ adam köçken. Olarnıñ arasında Qırımğa qaytıp olamağanları da bar. Şunıñ içün bu leyha olarğa eñ azından yarımadanı virtual körmege imkân bere.
Malümat olaraq
- Rejissör, teatr ve kino aktörı, “Qırım evi” müdiri, qavmiy qırımtatar Ahtem Seitablayev Özbekistanda Taşkent yanındaki Yangiyül şeerinde doğdı. Anda onıñ ana-babası 1944 senesi sürgün etilgen edi. Onıñ qorantası Qırımğa tek 90-ıncı senelerniñ başında qayttı. Qırım işğal etilgen soñ Ahtem Seitablayev yarımadnı terk etmege mecbur oldı.
