Bunıñ aqqında qadın işğalcılarnen körüşüvinden soñ tarif etti. 

Beyanatta qayd etilgeni kibi, maşna keldi, içinde ise, bu adiy bir sorav olğanını inandırğan erkeknen qadın otura edi. 

“Ekisi de tibbiy maskasız. Özüni tanıştırmadılar, “qasevet etmeñiz, o adiy bir sorav” dep ayttılar. Arttaki oturğıçına oturmağa teklif ettiler, men ise red ettim. Men bir-de-bir din teşkilâtlarda bulunam mı dep maña sual berdiler”,- bildirdi Anna. 

Qadın, advokatnen bağlanıp, hadimlerni, onen  angi vesiqalar esasında sorav keçirmege istegenlerini sordı. Cevap olaraq olar, Qırım Cemhuriyeti boyunca İİN çıqış malümatlarnen vesiqanı kösterdiler. 

“Kâğıtlarda, tedbirler ve farqlı rayonlar boyunca yañı din adamlarnıñ cedvelleri aqqında yazılğan edi. Nijnegorsk rayonında 4 adam bar edi. Yani, men, aqayım ve 2 insan- olarnıñ soyadıları belli degil. Hadimlernen teklif etilgeni kibi, iza etüvini yazmadım ve şifaen şaatlıq etmekten vazgeçtim. Hadimler degeni kibi, bu alda, maña İİN vekilleri kelip menen muzakere etecekler”,-dep qoştı siyasiy mabusnıñ ömür arqadaşı.

Qayd etilgeni kibi, Bogaçöva bu cedvellerde aqaynıñ soyadını körgen.

“Cedvelde aqayımnıñ soyadını körip olarğa ayttım. Hadim ise, “pek yahşı, ekisini de işlermiz” dep cevap bergen. Olarnıñ iç haberi olmağanı körüne edi, yoqsa haberi olmağanını kibi yapa. Şimdi Başkortostan cemhuriyetinde bulunğanını dedim ve, elbet te, hadim bunı vesiqağa yazdı. Bu yerde muzakere bitken, olar da kettiler”,-dep bitirdi öz muzakereni qadın. 

Advokat Lilâ Gemici tüşüngeni kibi, hadimlerniñ böyle areketler qanunsız ve ruhsetsizdir. 

“Olar kettiler, amma başqa hadimler kelecek dep  sözlerine qorqutuvnı gizlediler. Anânıñ, insan olaraq, din seçüvine ve sebebini añlatmayıp malümatnıñ berilmesinden red etüvine bütün qanuniy aqları bar”,-dep tüşüne advokat.

Belli olğanı

• Anna Bogaçöva - İslam dinini öz istegine köre qabul etken rusiye musulmanı. Vadim Siruk İslamnı 20 yaşında qabul etken ve bugünki vaqıtqa qadar tevqif ve cezahanesine baqmadan bütün din qaidelerine riayet ete.
•  2019 senesi qasım aynıñ 12 Rostov-na-Donudaki Cenübiy arbiy bölük makemesi Vadim Siruknı 12 yılğa azatlıqtan marum etilgen edi.
• 2020 senesi kiraz aynıñ 25 Moskva vilâyetteki Vlasiha şeer bölüginiñ Arbiy istinaf makemesi  “Hizb ut-Tahrir yalta davası” boyunca mahküm etilgen altı musulman qırımtatarına ükümni bütünle quvette qaldırğan.