Bu aqta "Qırım birdemligi" cemaat birleşmesi haber etti.

Advokat Edem Semedlâyevniñ aytqanına köre, istinaf şikâyetini 14 kâğıtta yazğanlar.

Cemaat jurnalistiniñ maddesi ağır olğanı içün mahkeme oturışı qapalı keçken, advokat ise videokonferentsiya vastasınen esnasta iştirak etken. 

"O qadar qasevetlengen olsalar, qaravul arttırılsın, penceredeki parmaqlıqlar eyiliştirilsin, OMON ve Cezalarnı yerine ketirüv federal hızmetiniñ hadimlerine daa çoq avtomat berilsin dep muracaat ettik. Bugün Üçünci istinaf mahkemesinde açıq rejimde oturış oldı, amma Qırım Yuqarı mahkemesinde qapatıldı", – dedi Semedlâyev.

Qırım Cumhuriyetiniñ Yuqarı mahkemesi Remzi Bekirovğa qarşı ceza qanunlarını yañlış qullandı, hususan 4-ünci Jeneva konventsiyasını qullanmadı. 

“Remzi mahkemede akvariumda tutula, amma Avropa mahkemesi bu insan itibarını aşalay, dep qayd etken edi. Masası bile yoq", – dedi advokat.

Malümat olaraq

• 2019 senesi saban ayınıñ 28-nde FSB, Rusiye İç işler nazirligi ve Rusiye gvardiyasınıñ hadimleri Qırımda qırımtatarlarnıñ, şu cümleden "Qırım birdemligi" faalleriniñ evlerinde tintüvler keçirdi. Rusiyede ve işğal etilgen Qırımda yasaqlanğan "Hizb ut-Tahrir" teşkilâtında iştirak etüvnen qabaatlanğan 24 faal tutulğan edi. Tutulğanlar arasında qırımtatar cemaat jurnalisti Remzi Bekirov bar edi.
• "Memorial” aq-uquq qoruyıcı merkezi ekinci Aqmescit “Hizb ut-Tahrir davası”nıñ iştirakçilerini siyasiy mabüsler dep tanıdı.
• 2019 senesi oraq ayınıñ 18-nde Avropa Parlamenti qarar qabul etip, bütün ukrain siyasiy mabüslerini azat etmege çağırdı.