Bunı Ukraina Milliy telükesizlik ve mudafaa şurası kâtibiniñ muavini Sergiy Krivonos “DOM” telekanalınıñ yaynında ayttı.

Onıñ aytqanına köre, Rusiye Kahovkadan Qalançaqqa taba Şimal Qırım beketiniñ qısmını zapt ete bile. 

“Mesele şunda ki, Qırımğa suv töpege berile, Şimal Qıırm beketiniñ çalışıp başlaması içün ruslar çoq iş yapmalılar. Al-azırda böyle bir şey yapılmay. Şunıñ içün zap etseler bile, suv birden peyda olmaycaq”, - dedi o. 

Bu malümatnı tek Ukraina istihbaratı bildirmey, daa işğal etilgen Qırımdan kelgen sakinler de bildire. 

Beketniñ zapt etilüvi RF tarafından açıq tecavuz kibi sayılacaq. 

“Bu memleket reberligine tesir etmege ıntıluv, yani şantaj daa demek mümkün. Añlaymız ki, tehnikiy ceetten Rusiye bunı yapa bile. Amma dünya toplulığı ögünde kendini nasıl etip aqlaycağı belli degil, çünki bu açıq tecavuz olacaq”, - dedi Krıvonos. 

Malümat olaraq

• Rusiye özüni işğalci bir devlet kibi tanımalı ve halqara uquqqa köre işğal altındaki Qırımğa suv berilüvi mevzusında muzakereler başlamaq içün resmiy muracaat etmeli.
• 2014 senesinece Ukraina Şimal Qırım beketinden Qırımnı suvnen temin ete edi. 2014 senesi Rusiye yarımadanı işğl etken soñ suv teminatı toqtatıldı. 2020 senesi işğlciler Qırımda suv qıtlığı olğanını tanıdı.