ABD Rusige Qırım işğalden azat etilmegence sanktsiyalar lâğu etilmeycegini açıq şekilde köstermeli, - Volker
ABD Devlet departamentiniñ Ukraina meseleleri sabıq mahsus temsilcisi Kurt Volker, ABD Rusige Ukrainağa qarşı tecavuz toqtamağance ve Qırım işğalden azat etilmegence sanktsiyalar lâğu etilmeycegini açıq şekilde köstermeli dedi.
“Amerika Sesi” haber etkenine köre, bunı Amerika Avropa siyaset talili merkezi tarafından teşkil etilgen forum vaqtında ayttı.
Volkerniñ aytqanına köre, ABD Ukraina içün Rusiye ile muzakerelerde iştirak etecek, Almaniya ve Frenkistan ile işni koordinatsiya etecek, Vaşington siyasetini destekleycek, NATO ve AB, Kanada, ve Büyük Britaniya ile işlernen ögraşacaq bir mahsus elçini tayin etmeli.
Bu mahsus elçiniñ esas vazifelerinden biri Rusiyege qarşı sanktsiyalarnıñ uzatılmasını temin etmek olacaq.
“Boylece, sanktsiyalar Rusiye Ukrainağa qarşı tecavuzını toqtatmağance ve Qırımnı azat etmegence lâğu etilmeycegini añlaycaq”, - dedi o.
RF prezidenti Vladimir Putin içün Ukrainağa tecavuzınıñ qıymetini ruslarnıñ özleri arasında arttırmaqnıñ kerekligini qayd etti.
Malümat olaraq
- ABD Devlet departamentiniñ Ukraina meselelerinden sabıq mahsus temsilcisi, Rusiyeniñ arbiy qudreti içün, Qırımnı arbiy yolnen işğalden azat etilmesi em adamlarnıñ ayatı, em mülkiyet içün yoq etici olacaq, dep saya.