“Safinar Cemileva” : işğal altındaki Qırımda mahke oturışında şaatlarnı silâ aqqında sorğuğa çektiler
Qırımda ğıyabiy şekilde mahkemelengen qırımtatarlarnıñ milliy lideri Mustafa Cemilevniñ evinde silâ saqlav talapları bozulmadı. Bu malümatnı Rusiye nezareti astındaki Ermeni Bazar şeer mahkemesinde ceviz ayınıñ 24-nde sorğuğa çekilgen qabaatlav şaatları aytıp berdi.
Bu aqta “Qırım birdemligi” cemaat birleşmesine advokat Nikolay Polozov haber etti.
Cemilevniñ ömür arqadaşı Safinar hanımnıñ soyu Aliye Selimovanıñ aytqanına köre, Cemilevlerniñ evinde sıq-sıq olıp, anda iç bir vaqıt silâ körmedi, bazı odalar ise er vaqıt kilitlengen edi.
Safinar Cemilevanıñ oğlu Eldar Ebubekirov da mahkemede bu malümatnı tasdıqlap, silâ olğan seyf anahtarı tek Mustafa Cemilevde bar edi, dep ayttı. Onıñ bildirgenine köre, insannı öldürgeninde qabaatlanğan ve Qırım işğalinden soñ Rusiye cezahanesine yollanğan Cemilevniñ oğlu Hayser oña "babasınıñ odasına pencereden kirip, oda anahtarını aldı ve silâ olğan seyfni açtı", dep ayttı. Şaat, daa evel Mustafa Cemilev "ancaq siyasiy sebeplerden cinaiy taqiplerge oğratıldı", dep qayd etti.
Şaat Dilâver Suleymanov İç işler nazirliginiñ hadimi olğanını (2013 senesi) ve Cemilevniñ evinde silâ saqlav qaidelerini eki ya da üç kere teşkerdi, dep bildirdi. Onıñ aytqanına köre, "bozuvlar qayd etilmegen edi". Berilgen malümatqa köre, parça-parça etilgen silâ mahsus demir qutusında, başqaları kirmegen ayrı odada saqlanğan edi.
Nevbetteki oturışysyü keçirilüvi ceviz ayınıñ 25-nde saat 9:00 olacaq.
Malümat olaraq
- Hayser Cemilev 2013 senesi mayısta Bağçasaraydaki eviniñ azbarında babasınıñ silâsından qoranta tanışı Fevzi Edemovnı öldürmesi ile qabaatlana. Qırım işğalinden soñ Rusiye taqiqat organları işni ğayrıdan taqiq etmege qarar alğan edi. Hayserni Aqmescit SİZOsından Krasnodar ülkesine alıp kettiler. Rusiye Federatsiyasınıñ Yüksek mahkemesi, Hayser Cemilevge Krasnodar mahkemesi tarafından tainlengen 5 yıllıq apis müddetini bir-buçuq yılğa qısqarttı.
- 2015 senesi oraq ayında Avropa insan aqları mahkemesi Hayser Cemilevniñ azat etilmesi aqqında qarar çıqardı. 2016 senesi qasım ayınıñ 25-nde Hayser azat etildi ve Kıyivge ketti.
- Mustafa Cemilev Rusiye Ceza qanunnamesiniñ üç maddesine köre qabaatlanıla. Rusiye qanunlarına köre o, üçten altı yılğa qadar makhüm etile bile. Cemilev "Qırım yürüşinde" iştirak etecegi aqqında bildirgen soñ Rusiye tahqikat komiteti davalarnı yañıdan baqıp başaldı.
