Zelenskıynıñ çıqışını ceviz ayınıñ 23-nde Prezident ofisi yayınladı. 

“BMT tesisçileri, 75 yıl soñra Avropanıñ merkezinde bir cenk olacağını bilse ediler ne ise eter ediler? Qırımda insan aqlarınıñ qaba şekilde bozulğanını, ukrain ve qırımtatarlarğa qarşı zulum etilgenini, yarımadanıñ ve yanındaki akvatoriyanıñ askerilleştirilüvi artqanını, Qara deñiz bölgesiniñ telükesizlik balansı bozulğanını bilse edi”, - dedi prezident. 

Onıñ aytqanına köre, Avropanıñ merkezinde “qanap turğan” yaranı yalıñız Qırımnıñ ve Donbasnıñ işğalden azat etilüvi “yahşı etecek”. 

"Eñ müimi: Qırım ve Donbas meseleleri adiy manzaranıñ elementlerine çevirilmemelidir, mında yalıñız maruzalarnıñ, mevzuiy körüşüvlerniñ ve işğalniñ yıllığı içün protokol bildirmeler halqara reaktsiyanıñ forması kibi qabul etilecegi yeterli degil”, - dedi Zelenskıy. 

Prezident ofisi bildirgenine köre, devlet başı yarımadadaki insan aqları ile bağlı yañartılğan qararnı da desteklemege çağırdı. 

“Fırsattan faydalanıp, dostlarımıznı Qırım sakinleriniñ aqlarını qorumaq ve yarımadanı işğalden azat etmek içün beraberlikte areket etmek maqsadnen halqara bir Qırım platformasınıñ meydanğa ketirilmesinde iştirak etmege davet etem”, -qayd etti o. 

Litvaniya prezidenti Gitanas Nauseda BMT BA 75-nci sessiyası Qırım ve Aqyar şeeri işğal altında olğanını ununtmağa davet etti ve Ukrainağa öz destegini bildirdi. 

Malümat olaraq

• Ukraina prezidenti Volodımır Zelenskıy ceviz ayınıñ 22-nde Avropa Birliginiñ tış işler ve telükesizlik siyasetinden Yuqarı temsilcisi Jozep Borrel ile körüşüv vaqtında Qırımnıñ işğalden azat etilmesi ile bağlı aytışmalar içün bir meydannnıñ yaratılmasını muzakere ettiler.
• Ukraina prezidenti Volodımır Zelenskıy ceviz ayınıñ 21-nde Qırımnıñ işğali ve Rusiyeniñ Donbastaki arbiy tecavuzı Ekinci cian cenki dersi menimsenilmegenini ve bazı memleketlerniñ dünyadaki tesir saalarını bölmege ıntılmağa devam etkenini köstere. 
• BMT insan aqlarından Yuqarı komissarınıñ ofisi kiçik aynıñ 16 - oraq ayınıñ 31 tarihleri arasında işğal altındaki Qırım ve Aqyarda insan aqlarınıñ bozuvları aqqında maruzanı yayınladı.