İşğalcılar “Hizb ut-Tahrir davasında” ekinci Aqyar gruppasınıñ iştirakçılarına üküm çıqarğanlar
Bugün, 31 mayıs, RF Cenübiy arbiy bölge makemesinde “Hizb ut-Tahrir davasında” ekinci Aqyar gruppasınıñ iştirakçılarına ükümni ilân etkenler. Cebbar Bekirovnı ilk dört yılnıñ apishanede keçirilmesinen 17 yılğa azatlıqtan marum etüvine mahküm ettiler. Rustem Murasov, Rustem Tairov ve Zavur Abdullayevge makeme, qattı nizamlı koloniyasında 12 yılğa azatlıqtan marm etüvini tayin etken: ilk 4 yılnı olar da apishanede keçirecekler.
Bunı Qırım birdemligi bildire.
Cebbar Bekirovğa da makeme, azatlıqtan soñ bir buçuq yılğa sıñırlamalarnı qoşqan.
Qayd etilgeni kibi, siyasiy mabuslar mantazam sürette közetici organlarına kelmek kerekler, bundan da ğayrı, öz yaşağan yerni taşlap vilâyetler arasında köçip CEEFH izini almağanca işini deñiştirip olamazlar.
Tafsilâtlıca oquñız: İşğalcılar dörtünci Bağçasaraydaki “Hizb ut-Tahrir” davasınıñ iştirakçılarına üküm çıqarğanlar
Foto menbası: Qırım birdemligi
Belli olğanı
- Qırımdaki işğal quvetçileri, arman aynıñ 17 saba saat 4’ten başlap Qırımnıñ Aqmescit, Bağçasaray ve Aqyarnıñ Balıqlava, Nahimov rayonlarında beş qırım tatarınıñ evinde tintüvlerni keçirgenler. Tahqiqiy tedbirlerni FTH, EQM ve MMTQ hadimleri keçire ediler.
- Tahqiqkiy tedbirlerniñ neticelerine köre, beş insan tutıp alınğan. Aqyar şeeriniñ Nahimov rayondaki FTH hadimleri, faaller Rustem Murasov ve Rustem Tairovnı tutıp aldılar, Aqyarnıñ Balıqlava rayonında - Cebbar Bekirovnı, Bağçasaray rayonında - faal Zaur Abdullayevni, Qırımnıñ Aqmescit rayonında - Raif Fevziyevni.
- Çiçek aynıñ 10 Rostov-na-Donudaki Cenübiy arbiy bölge makemesi, taqiqat tevqifhanesinde Qırımdan olğan faalleri Rustem Tairov, Zavur Abdullayev, Cebbar Bekirov ve Rustem Murasovğa tevqifniñ devam etilmesi aqqında rusiye prokurornıñ şefaatını memnün etken. Siyasiy mabuslar rostovdaki 1’ci taqiqat tevqifhanesinde 2023 senesi oraq aynıñ 23 qadar qalacaqlar.
Bizni Telegram'da oquñız
