Qırımda 68 yaşında olğan artrozlı qırım siyasiy mabusı Mambetovnı başqa taqiqat tevqifhanesine alıp keçirdiler

Любезна Катерина
·
12:15, 25 Quralay
Qırımda 68 yaşında olğan artrozlı qırım siyasiy mabusı Mambetovnı başqa taqiqat tevqifhanesine alıp keçirdiler
Foto menbası: crimean-solidarity.org

İşğalcılar Aqmescitteki yañı taqiqat tevqifhanesine 68 yaşında olğan ve artrozdan çekişken “Hizb ut-Tahrir davasında” ekinci Cankoydaki gruppasınıñ iştirakçısı Halil Mambetovnı keçirdiler. 1’ci taqiqat tevqifhanesinden keçirilmesi vaqtında siyasiy mabusınıñ közlükleri ve Quran ğayip olğanlar. 

Bunıñ aqqında onıñ ömür arqadaşı Liliya Mambetova, aqayınen körüşüvinden soñ “Qırım birdemligine” tarif etken

“O, sararğan ve boldurğan edi. Ayaqları pek ağıra. Qollarda  artrozdan şişikler körüne, ayaqlarnı kösterip olamağanını aytqan, amma basmağa ağır olğanını aytqan. Tevqiften evel de artrozı bar edi. Evde ilâclarnı içmege tırışqan edi, yardım etken edi. Şimdi fırsatı yoq. Bir qaç ilâcnı oña yolladıq, amma oña olarnı bermediler”, - tarif etti siyasiy mabusınıñ onkologiyanen hasta olğan ömür arqadaşı. 

Başqa cezahanesine keçirilüvi vaqtında Mambetovnıñ közlükleri ve Quran ğayip olğan. Bunen beraber körüşüvde işğalcılar qırımtatarca laf etmege yasaq etken ediler. 

“Tek rusça laf etmek mümkün olğanını ayttılar. Bir şeyni sormamaq, “keder etecek olğan” bir şeyni yapmamaq. Quran ve közlüklerni coydım. Endi yañıdan bunı kene de soray, alıp bereceklermi, yoqmı - daa haberimiz yoq. Pek ağır ve şaraitler pek qattı olğanını bilem. Yataq, ezilmesiñ dep onıñ üstünde oturmağa bile izin bermeyler”, - dedi o. 

Bundan evel Mambetovnı 1’ci taqiqat tevqifhanesinden hastanege yolladılar, anda ise - mecburen psihiatrik teşkerüvine alıp ketirdiler. Bundan soñ o, ay içinde “Qırım cumhuriyetteki 1’ci klinik psihiatrik hastanesinde” keçirgen. 

Belli olğanı

  • 2023 senesi qara qış aynıñ 24 Canköy rayonında kütleviy tintüvler vaqtında rusiye quvetçileri altı qırımtatarını tutıp aldılar, olarnıñ arasında pensioner Halil Mambetov da edi. Olarnı Aqmescitteki taqiqat tevqifhanesine yolladılar. 
  • Olarnıñ episine RF CK 205.5  (“Terroristik teşkilâtınıñ faaliyetiniñ teşkil etilmesi ve terroristik teşkilâtınıñ faaliyetinde iştirak etilmesi”) ve RF CK 278 maddesini (“Evelki añlaşması boyunca taqımnen azırlanılğan akimiyetiniñ tecavuziy zapt etüvine azırlanuvı”) yazdırdılar. 

Bizni Telegram'da oquñız