Bunıñ aqqında mabusnıñ ömür arqadaşı Oksana Zahtey, Kreml siyasiy mabuslarnıñ soy-soplarnıñ birligine tefsirinde haber etken. 

Zahteyni beş yıl devamında siyasiy mabusı olaraq tanığan ediler, amma 2023 senesi uvut ayında o azat etilgen. Bundan bir ay soñra onıñ ömür arqadaşı, öz aqayını Rusiye devlet organları ile azatlıqtan marum etilgen şahısı olaraq tanıması aqqında arizasınen Tesisara komissiyasına muracaat etken, amma reylerniñ yetmemesi içün red etilgen edi. 

Salı künü, mayıs aynıñ 9, Oksana, komissiya tekrarlı muracaatını qabul ettimi sormaq içün Reintegratsiya nazirligine telefon açqan. Arizasına köre müsbet qararı kirsetilgenini cevap berdiler. 

“Vesiqalarnıñ evelki paketine advokatımız, rusiye akimiyetinden Andreynen beraber bütün siyasiy mabuslarnıñ deral serbest etüvini talap etken Avropa parlamentiniñ eki qararını qoşqan. Bklki de bu qararlar qararına tesir etkenler, amma, menim fikirime köre, Tesisara komissiyasını evelki red etüvinden soñ halq ögünde yapılğan basqısı mecbur etken. Vaziyetimiz, siyasiy mabuslarnıñ soy-sopları ve uquq qoruyıcılarına aqiqatqa uymağan soyu kibi körülip halq tarafından rezonansnı peyda ettirgen”, - tarif etken Oksana Zahtey. 

Tafsilâtlıca oquñız: İşğal etilgen Qırımda “qırım diverstantlar” davasınıñ iştirakçısı Andrey Zahtey serbest etilgen

Bu yılnıñ uvut aynıñ 10 siyasiy mabusnı refaqat ile Rostov vilâyetindeki “Rusiye İİN “Don” EVVTM” FDM’ne keçirdiler, anda ise - makemeniñ qararına köre endi üç ay içinde bulunmaqtadır, mayıs aynıñ 12 qadar. Onıñ ömür arqadaşı, Zahteynen telefon ile bağlanabile, amma bağı pek yaaman. Oksananıñ sözlerine köre, aqayı, şimdi deşetli ruhiy alında buluna. 

“Aqayım, qaytuvına ümüt eterek, qattı nizamlı koloniyasında aman-aman 7 yıl bulunmaqta edi, amma üç ay içinde belli olmağan şaraitlerde buluna. Buna köre, onıñ ruhiy alı müthiş. Ufaq qızımız, babası ne vaqıt evge qaytacaq dep soray - onen niayet şahsen tanışmağa pek istey”, - qayd etti o. 

Belli olğanı

• 2016 senesi arman ayından qasım ayına qadar deviri içinde Qırımda 9 Ukraina vatandaşı tutuıp alınğan edi, olarnıñ arasında Andrey Zahtey bar edi. İşğal FTH hadimleri olarnı yarımadada Ukraina Mudafaa nazirligindeki terkiplerniñ meraqlarında diversiyalı faaliyetinde qabaatlağanlar. 
• Onı 2016 senesi arman ayında Armânsk rayonında tutıp aldılar. O vaqıt FTH, Qırımğa ukrain diversiyalı gruppasınıñ kirüvi aqqında bildirdi, olarnen atış neticesinde eki rusiye arbiyi elâk olğan. 
• Qabaatlavnıñ versiyasına köre, Qırımda şahsiy taşımasınen oğraşqan Zahtey, gruppanı qarşılap yarımadağa onıñ alıp keçirilmesini temin etmek kerek edi. 
• Qırımnıñ Yuqarı işğal makemesi, onı silânıñ qullanuvı ile diversiyanıñ azırlanuvında qabaatlanuvları boyunca 6,5 yılına azatlıqtan marum etüvine mahküm etken. 
• Zahtey, tutıp aluvı ve tahqiqat vaqtında yaşağan işkenceler aqqında bildirgen edi. 
• Davanıñ başqa iştirakçılarnıñ adlarını aytmayıp şahsiy iştirağına dair qabaatını qabul etip “tahqiqat”nen añlaşmanı imzalağan. Qırımğa köçken soñ alınğan rusiye vatandaşlığından Zahtey, 2017 senesi yazda “makemeniñ” qararına köre marum etilgen edi. 
• 2022 senesi orta küz ayında Andrey Zahteyni İşğal etilgen Qırımda Aqmescit ş. 1’ci qattı nizamlı icraiy koloniyasına 10 künge “çukurğa” - sanki dersin rejimniñ bozuluvı içün koloniyadaki mağazında kartserge yerleştirgenler. 
• 2023 senesi saban aynıñ 8 Devlet köçüv hızmeti, Zahteyge Ukrainağa qaytuvı içün vesiqalarnıñ alıp berilmesini red etken. RF’nen Ukrainanıñ konsul bağlarınıñ yoq oluvı sebebinden siyasiy mabusınıñ qaytaruvı, tek üçüncı ülkelerniñ iştirağı ile olmalı. Onıñ ömür arqadaşı, advokatnen beraber Aqayı içün çıqışını evelden razılaşqan Latviyağa muracaat etkenler. Şimdi siyasiy mabusınıñ evge qaytaruvı içün Latviyadan yazılı tasdıq etüvini bekleyler.

Bizni Telegram'da oquñız