Bunıñ aqqında “Qırım birdemligine” cemaat qoruyıcı Seyit-Osman Karaliyev bildirdi.

“Tintüvler aqqında aramalar saat yedide kelmege başladılar. Bariniñ aynı azbarında onıñ yaş anası yaşay. Ekisiniñ çağına yetmegen balaları bar, olar da evde bulunalar, ğaliba”, - qayd etti o. 

“Qırım birdemligi”niñ malümatlarına köre, faalleri Edem İsmailov ve Bari Bariyevlerniñ ömür arqadaşları ve ekisiniñ de üç balası bar. Bariyevniñ bütün balaları çağına yetmegen, İsmailovnıñ - üçten ekisi. 

35 yaşındaki Bariyevniñ evinde tintüv, saat 08:30 bitken. FTH hadimleri erkekni azbarğa çıqarıp maşnağa oturttılar ve Aqmescitke alıp ketirdiler. 

“Tintüv bitken soñ, Barini hadimlerniñ refaqatı ile evden çıqardılar, olarnıñ bazıları silânen kelgen. Umumen on şahıs. Maskada hadimlerden biri, Aqmescitke Franko bulvarına muzakere içün alıp ketirgenleri ve aqşamğa qada Bari, evge qaytacağını aytqan. Soy-soplarğa tintüv protokolnı qaldırğanlarını aytqan. Amma soy-soplar protokolnı qaldırmağanlarını bildirdiler”, - tarif etti cemaat qoruyıcısı. 

Edem İsmailovnıñ evindeki tintüv saat 09:45 bitken. Karaliyev qayd etkeni kibi, onı da Aqmescitke alıp ketirdiler. 

Keçken yıl işğaller sebebinden evsiz qalğan qırımtatar milliy areketiniñ veteranı Rustem Üseinov, “Qırım birdemligine” sabalıq tintüvlerni tefsir etken. 

“Bugun suvdağda duşmanlarımız, hılqımıznı kene de basqığa oğradılar. Genç vatandaşımız Barini alıp çıqardılar. Soñra Edemni de aldılar. Basqılar toqtalmay. Amma, Allanıñ iradesi ile eyi neticesi olacağını bilemiz. Öz areketlerniñ aqibetlerni añlamaylar, ğaliba. Amma, çoq olsaq ve halqımız bir olsa, Allanıñ iradesi ile eyi künlerni körermiz. Alla bizge sabr bağışlasın”, - qayd etti o. 

Bunen beraber qırımtatar milliy ruhunıñ faali, Suvdağ vilâyet Meclisiniñ başı İlver Ametov ilân etkeni kibi, Suvdağdaki tintüvler Qırımda işğalcılarnen tevqif etilgen Meclis baş muavini Nariman Celâlnıñ doğğan kününde keçkenler.

“Bugun halqımız kene de tintüvlerge oğrağan. Allanıñ yardımınen er şey deñişir, er şey yahşı olcaq. Alla, halqımızğa sabr bersin. Endi çoq şey yaşadıq. Halqımızğa qarşı basqılarda iştirak etken er kes, Allahtan öz cezasını alır. Bugün Nariman Celâlnıñ doğğan künü eken. Onı Suvdağ şeerdeki cemaatınıñ adından hayırlaymız. O da sabr bildirsin. Alla Narimanğa da sabr bersin!”, - haber etti o. 

Belli olğanı

• Salı künü, çiçek aynıñ 25, vaqtınca işğal etilgen Qırımdaki Qarasuvbazarında rusiye quvetçileri uquq qoruyıcı Abdureşit Cepparovda tintüv keçirdiler.
• Çiçek aynıñ 25 rusiye quvetçileri uquq qoruyıcını “miliske boysunmamazlığında” qabaatlanğanları aqqında belli oldı. Onı işğal etilgen Aqmecitteki Demiryol rayon bölügindeki cezahanesinde tutalar. 
• Ukraina prezidenti Vladimir Zelenskiy, çiçek aynıñ 25 qırımtatatar uquq qoruyıcısı Abdureşit Cepparovnıñ tintüvi ve ilerideki tutıp aluvını "Qırımdaki tamır halqına qarşı rusiye basqılarnıñ daa bir misali" olğanını aytqan.
• Onı 12 künge tevqif ettiler. 

Bizni Telegram'da oquñız