Qırımda işğalcılar uquq qoruyıcu Abdureşit Cepparovda tintüv keçirdiler
Salı künü, çiçek aynıñ 25, vaqtınca işğal etilgen Qırımdaki Qarasuvbazarında rusiye quvetçileri uquq qoruyıcı Abdureşit Cepparovda tintüv keçirdiler.
Bunıñ aqqında “Qırım birdemligi” cemaat teşkilâtı öz Facebook saifesinde bildire.
“Qarasuvbazar şeerinde qırımtatar uquqqoruyıcı Abdureşit Cepparovnıñ evinde tintüv keçirile. Tafsilâtlar soraştırıla”, - denile beyanatta.
Tafsilâtlıca oquñız: Bütün “qırmızı şeritler” çoqtan keçirilgen: qırım advokatı, “diversiya” sebebinden qırımtatarlarda olğan çoq sayılı tintüvler aqqında tarif etti
Menba: facebook.com / crimeansolidarity
Cepparovnıñ soy-sopları qayd etkenleri kibi, işğalcılar tahminen saat 7:00’de kelgenler, saat 10:00’da ise bitken.
“Tintüv, yarım saat evel bitken. Onı tutıp aldılar. Advokatnı çağırıp olamadıq, çünki telefonlarnı musadere ettiler. Tintüv vaqtında evde ömür arqadaşı ve 14 yaşındaki qızı olğan edi”, - bildirdi uquq qoruyıcısınıñ soy-sopı.
Tafsilâtlıca oquñız: İşğalcılar partizan areketinden pek qorqalar: uquq qoruyıcı qırımtatarlarnıñ tintüv sebepleri aqqında tarif etti
UPD: Abdureşit Cepparovnıñ ömür arqadaşı Niyara Abdurayimova, 102 sıcaq şeritine miliske müracaat etken. Polisniñ işğal hadimleri uquq qoruyıcınıñ evine protokolnıñ tizilmesi içün kelgenler.
Abdureşit Cepparovnıñ ömür arqadaşı Niyara Abdurayimova. Menba: facebook.com / crimeansolidarity
Belli olğanı
- Çiçek aynıñ 3 işğalcılar, siyasiy sebeplerden olunğan makeme oturaşlarnı muntazam sürette ziyaret etken qırımtatar faali Fazil Emirüseinovnıñ evinde tintüv keçirdiler.
- Saban aynıñ 15 Qırımnıñ Aqmescit rayondaki Urojaynoye köyünde FTH işğal hadimleri uvut aynıñ 23 Bağçasaray rayondaki demiryolnıñ bozuluvı aqqında beyannamesi sebebinden faal ve grajdan jurnalisti Rolan Osmannıñ evinde tintüv keçirdiler. Onı Aqmescitteki FTH idaresine alıp ketirdiler.
- Saban aynıñ 12 Urojaynoye köyünde işğal quvetçileri qırımtatar halqnıñ Qurultay namzeti Lemmar Yunusovnıñ evinde tintüv keçirdiler.
- Uvut aynıñ 28 FTH hadimleri Qırımdaki Aqmescit rayonında Soyin Celilovnıñ evinde ediler, saban aynıñ 6 - Suvdağda Edem Murtazayevniñ evinde, saban aynıñ 9 operativ hadimleri daa eki qırım tatarı - Qırımdaki Krasnogvardeyskoye rayonında Memet Aşurovğa ve Qırımda bulunmağan Asan Abduramanovğa kirdiler. Saban aynıñ 11 Ahtem İsmailovnıñ evine. Olarnıñ episi, Poştovoyedeki demiryolnıñ bozuluvına er bir alâqasını red ete.
Bizni Telegram’da oquñız