Uyğun arizanı QırımSOS uquq qoruyıcı teşkilâtı paylaşqan. 

“Biz, uquq qoruyıcı teşkilâtlarnıñ vekilleri olaraq, rf akimiyet vekilleriniñ cinaiy areketlerni mahküm etip Ukraina vatandaşı Leniye Ümerovanı deral serbest etmege; Leniye Ümerovanıñ qanunsız tevqif etüv vaqialarnıñ semereli ve obyektiv tahqiqatını keçirmege; Qırım MC ve Aqyar ş., Ukrainanıñ başqa işğal etilgen territoriyalarında ya da Rusiye Federatsiyasınıñ territoriyasındaki cezahanelerde tutılğan bütün siyasiy mabuslar ve grajdan reinelerini deral serbest etmege talap etemiz”, - denile yazıda. 

Uquq qoruyıcılar ecnebiy devletler ve halqara teşkilâtlarnıñ akimiyetlerni Ümerovanıñ qanunsız tevqifine ve adliye ve resmiy makemesine alâqalı olğan şahıslarına qarşı şahsiy sanktsiyalarnı kirsetmege ve qanunsız sürette tevqif etilgenlerniñ serbest etüv mehanizmlerniñ araması ve RF territoriyasında olarnıñ sağlıq alınıñ teşkerüvi içün halqara mesleatlarnı keçirmege çağırğanlar.

Tafsilâtlıca oquñız: “Episi bu, rusiye pasportnı almağa red etüvi sebebinden”: RF’nen 4 ay içinde reine olaraq tutılğan qız qardaşı aqqında Aziz Ümerovnıñ ikâyesi

Bundan da ğayrı, uquq qoruyıcılar Türkiye Prezidenti Recep Tayip Erdoğanğa rf prezidentinen muzakereler yolu ile Ümerovanıñ serbset etüvine tesir etmege ricasınen muracaat eteler. 

Ariza, Ukraina devlet akimiyet organlarına Ümerovanıñ qanunsız tevqifiniñ vaqialarınıñ semereli tahqiqatını temin etip oña dair Ukraina Cinaiy Kodeksiniñ 438 m. köz ögünde tutulğan cinayetniñ esasında cinaiy davasını açmağa ricasından da ibaret. 

Arizanı Qırım uquq qoruyıcı gruppası, “Dİ” uquq qoruyıcı merkezi, ZMINA insan aqları merkezi, QırımSOS uquq qoruyıcı merkezi, Siyasiy mabuslarnıñ serbest etüv platforması, Kreml siyasiy mabuslarnıñ soy-soplarınıñ birleşmesi, Cemiyet serbestliklerniñ merkezi, İnsan aqları oğrunda medialı teşebbüsı, Barışıq ve muabbetlik institutı, Qabarcılıqqa qarşı Harkiv merkezi.

Belli olğanı

• 2022 senesiniñ soñundan beri Rusiyeniñ territoriyasında qanunsız sürette qırımtatarı Leniye Ümerova bulunmaqtadır. O, tedaviylenip olamağan hasta babasını baqmaq içün işğal etilgen Qırımğa ketkende onı gürci-rusiye sıñırınıñ keçüvi vaqtında tutıp aldılar. Onıñ ağası, uquq qoruyıcılar, faaller ve akimiyetini Ümerovanı esirden çıqarmağa tesir etmege çağıra. 
• Qırım uquq qoruyıcı gruppası (QUQG) bildirgeni kibi, Şeerdeki rayon makemesi, qırım tatarını “devlet sıñırdaki rejiminiñ bozuluvında” (RF CK 18 m. 1 q.) qabaatlı tanıp oña 2 biñ ruble miqdarında cöreme ödetken. Bu yılnıñ saban aynıñ 16 qadar Ümerovanı Vladikavkaz rayonında ecnebiy vatandaşlarnıñ vaqtınca tutuv merkezinde tutqan ediler. 

Bizni Telegram'da oquñız