Bunıñ aqqında QırımSOS’nıñ talilcısı Yevgeniy Yaroşenko bildirdi. 

“Qabul etilgen qanun leyhasına binayen, elektron celpnameleri kâğıt soylarnı kopiyalacaqlar. Rusiye, qanunberici tuzetmelerni işğal etilgen territoriyalarına, ayrıca Qırımğa da tarqatacaq. Böyleliknen, rusiye akimiyeti, RF ve işğal etilgen territoriyalarında çağıruvına kelişken yaşında olğan ealisi üzerinde nezaretini quvetleştire ve rusiye ordusınıñ sıralarında hızmetinden vazgeçmege fırsatından onı marum ete”, - qayd etti o. 

Böyleliknen, 2023 senesi çiçek aynıñ 11 RF Devlet Duması, üç oqutuvda arbiyge bütün mecbur olğanlarınıñ sicili aqqında qanun leyhasını qabul etken. Celpnamelerni yazılğan şeklinde alınğan alı aqqında mektübinen poçta ile ve elektron şeklinde yollaycaqlar. Bunen beraber, celpname, “Devlet hızmetleri” saytındaki şahsiy kabinetinde onıñ peyda oluvından başlap alınğan alında sayılmaqtadır, yani arbiy hızmetine mecbur olğanı, bu celpnameni körgenmi, yoqmı kimseni meraqlanmaz. Yani endi arbiy komitetinden celpnameniñ alınmasından kimse vazgeçip olamaz.

Celpname, devlet hızmetlerniñ saytındaki şahsiy kabinetinde peyda olğanda, şahısqa RF ve işğal etilgen territoriyalarından çıquvı birden yasaq etile. Daa qanun leyhasında uquq qoruyıcılar maşnanı toqtatıp onı teşkirgende aydayıcınıñ celpnamesi bar olğanda o, arbiy komitetine kelmegenini kösterilse, onı aydayıcı aqlardan marum etebileler. 

Vatandaş, celpnameniñ alınğan kününden ve onı “Devlet hızmetlere” yayınlamasından 20 kün içinde arbiy komitetine kelmek kerek. Aynı zamanda arbiy esabına turuvı vaqtında arbiy komitetinde bulunmağa keregi yoq. Qabul etilgen qanun leyhasınıñ tafsilâtlı añlatuvını Litvaniyada yaşağan rusiye blogeri Maykl Naki yapqan. 

Rusiye ordusına işğal etilgen territoriyalar, bunen beraber Qırımdaki sakinlerniñ çağıruvı, IV Jeneva qararınıñ 51 m. yasaq etilip Halqara cinaiy makemesiniñ Roma statusınıñ (2)(a)(v) m. binayen arbiy cinayeti ola. Halqara cinaiy makemesiniñ Roma statusınıñ (2)(b)(xv) m. binayen, Ukraina vatandaşlarnı şahsiy devletine qarşı arbiy areketlerde iştirağına mecbur etüvi, ayrı arbiy cinayeti sayılmaqtadır. 

Belli olğanı

• Qırımnıñ işğal yılları içinde Rusiye, 16 qanunsız çağıruv kampaniyasını keçirgen, 2023 senesi çiçek aynıñ 1 rusiye işğal ordusınıñ sırasına nevbetteki baar çağıruvı başlanğan. 
• 2022 senesi küzde Qırımda qanunsız mobilizatsiyası olıp keçken. Onıñ ilk künü içinde celpnamelerni eñ azdan 5 biñ Qırım sakinine alıp bergenler. Daa mobilizatsiyasınıñ bitüvi aqqında resmiy beyanatına baqmadan, onıñ gizli şeklini devam etken ediler.  

Bizni Telegram'da oquñız