Bunıñ aqqında “Qırım ceryanı” uquq qoruyıcı leyhası bildire. 

“Qabaatlavnıñ versiyasına binayen, makemede onıñ qabaatı bütünle tasdıq etilgen edi. O, “Qırım” göñülli batalyonına paralarnı bere edi ve başqa bölüklerniñ maliyeviy desteklemesi içün niyetleri de bar edi eken. Makeme munaqaşaları vaqtında prokuror, makemeci Oksana Karçevskadan Appaz Kurtamet içün 10 yılğa azatlıqtan marum etüvinde cezasını istegen”, - denile beyanatta. 

Öz nevbette, imaye tarafı şunı qayd etti ki, bu göñülli batalyonı qanunsız silâlı şekillendirüvlerine ait olğanı aqqında iç bir delili yoq, imaye astında olğanınen cinayetniñ eda etüviniñ maqsadı da tasdıq etilmegen. Bundan da ğayrı, advokatlar cinayetniñ terkibiniñ yoq oluvı sebebinden davanı ya toqtatmaq, ya da çevirilip cezasını azatlıqtan marum etüvsiz çıqarmağa çağırğanlar. 

Appaz Kurtamet, soñki sözünen çiçek aynıñ 19 çıqar, bundan soñra ükümni qabul eterler. 

Belli olğanı 

• Kurtamet, Novoalekseyevkadan “Çonğar” KÇNN’na kirip 2022 senesi oraq aynıñ 23 ğayıp olğan. Erkek, Qırımdaki soy-soplarına yol tutqan edi. 
• Aqmescitteki Kiyev işğal rayon makemesi, qırımtatarını RF CK 208 m. 1 q. (qanunsız silâlı şekillendirüvniñ teşkil etilmesi ya da onda iştirağı, ve RF meraqlarına uymağan silâlı davasında ya da arbiy areketlerinde iştirağı) boyunca cinayetniñ eda etilmesinde şübelenip onı apis etmegence, orta küz ayına qadar onıñ aqqında iç bir şey belli olmağan edi. 
• Bu davası boyunca makeme tahqiqatı, tek bu yılnıñ uvut aynıñ 17 başlanacaq.

Bizni Telegram'da oquñız