Bunıñ aqqında advokat Safiye Şabanova “Qırım birdemligine” tarif etti. 

Böyleliknen, saban aynıñ 15, musulman, sağlıq alı sebebinden makeme muzakerelerinde çıqışta bulunıp olamağan - siyasiy mabusınıñ sıcağı, öksürigi bar edi. Olarnı saban aynıñ 27’ne keçirdiler. 

“Lâkin afta içinde alı kerginleşken, küçlü baş ağrısı peyda olğan. Acele yardımı ile alıp hastanege yatqızdılar”, - haber etti uquq qoruyıcı. 

Onıñ sözlerine köre, onıñ imayesi astında bulunğanınıñ sağlıq meseleleri daa 2008 senesi alınğvn ağır qapalı qafa-miy yarasından soñ peyda olğanlar. Bunen beraber Sizikov özü aytqanı kibi, onıñ betindeki asabı suvuqlanğan, amma muayen diagnozı daa yoq. Saban aynıñ 24 teşkerüv keçirilgen edi. 

Şabanova qayd etkeni kibi, davanıñ baquvını çiçek aynıñ 18 saat 10:00’na keçirdiler. 

Belli olğanı 

• 2020 senesi oraq aynıñ 7 kütleviy tintüvler vaqtında yedi insan tutıp alınğan edi. Aqmescit şeeriniñ Kiyev rayon makemesi, tutıp alınğanlarnıñ altısı içün tevqif astında tutuvı olaraq sıñırlama tedbirini seçip alğan.
• İsmet İbragimov, Zekirya Muratov, Vadim Bektemirov, Emil Ziyadinov, Alim Sufyanov, Seyran Hayredinov makeme zalında tevqif etilip Aqmescitteki tahqiqiy tevqifhanesine kirsetilgen ediler. Körüv boyunca I gruppadaki saqatlı olğan Aleksandr Sizikov, ev tevqifine yollanılğan edi.  
• Tutıp alınğın er kesni rusiyede terroristik kibi tanılğan, amma dünyadaki ülkelerniñ çoqusında milliy qanunlarına köre, sıñırsız areket etken “Hizb ut-Tahrir” islam siyasiy fırqasına alâqasında qabaatlaylar. 
• 2023 senesi qara qış ayında devlet prokuror, “Hizb ut-Tahrir” davasında Cenübiy arbiy bölge makemesinde kör olğan musulmanı Aleksandr Sizikov içün 18 yılnı istegen. 

Bizni Telegram'da oquñız