Bunı “Qırım birdemligi” bildire. 

Qayd etilgeni kibi, tevqiften evel Ansar Osmanov, “Qırım birdemligi” cemaat areketiniñ iştirakçısı ve evelden tevqif etilgen qırımtatar musulmanlarnıñ siyasiy sebeplerden açılğan davaları boyunca makemelerniñ faal ziyaretçisi edi. 

RF devlet qabaatlayıcı, Sergey Aydinov, munaqaşalarda “Ansar Osmanovnıñ qabaatı tasdıqlağanını” bildirip rusiye devlet qabaatlayıcısınen istenilgen müddetini – qattı nizamlı koloniyasında 18 yılğa azatlıqtan marum etüvini ilân etken. Bu müddetten ilk 4 yılnı 47 yaşında olğan Ansar Osmanov, eñ qattı şaraitlerde – apiste keçirmeli. 

“Terrorizmde qabaatlavlarına baqmadan, Osmanovnıñ cinaiy işiniñ malümatlarında silâ, patlayıcı aletiniñ saqlanuvı ya da qabaatlanılğannıñ terraktlarnıñ yapılmasında aqiqiy niyetleri aqqında iç bir añıluvı yoq. Ansar Osmanov özü, öz qabaatı, terroristik faaliyetine aitligini red etip öz areketlerni qanunsız olğanını saymay”, - denile beyanatta. 

“Qabaatlavnıñ esası, Ansar ağa ve Seytosmanov turmuş ve diniy mevzuları, qırımtatarlarnıñ taqip etüvleri, ailelerine nasıl yardım etmek aqqında laf etkende Seytosmanovnıñ evinde gizli yazuvı olğan. Bu yazuv, Seytosmanovnıñ evinde gizli tarzda yapılğan edi, soñra ise - tahqiqatqa kerek olğanı kibi çevirilgendir”, – tefsir etti Emil Kurbedinov, Ansar Osmanovnıñ advokatı. 

Belli olğanı

• Kelecek oturış, saban aynıñ 28’ne tayin etilgen. Munaqaşalarda imaye tarafınıñ çıqışı ve Ansar Osmanovnıñ soñki sözü planlaştırıla. 
• Osmanovnı başqa qırımtatar faallernen beraber bu yıl uvut aynıñ 9 tutıp aldılar. Rusiye quvetçileri Bağçasaray rayondaki Tankovoye köyünde onıñ evine saba tahminen saat dörtte kelgenler. 
• Osmanovnı, Rusiyede 2003 seneden itibaren yasaq etilgen, amma Ukraina territoriyasında sıñırsız areket etken “Hizb ut-Tahrir” siyasiy fırqasınıñ faaliyetinde iştirağında qabaatlaylar. 

Bizni Telegram’da oquñız