Mayıs aynıñ 13 saba saat 8-de Qırım Muhtar Cemhuriyetteki musulmanlarnıñ diniy idaresiniñ camisinde imanlılar bayram-namazını qılalar.

Duadan soñ müfti Ayder Rustemovnıñ vaazını diñley ediler.

"Ramazan ayı- Alla Taalâğa ibadet etüv, Korannı oquv ayı ve cümertlik ayı. Sadaqa bermek kerek olğan ayı. Ümüt etem ki, bütün musulman cemiyeti bu aynı munasip seviyesinde keçirdi. Alla er tutulğan orazanı qabul etsin", - qayd etti Rustemov.

Vaaz vaqtında müfti şunı hatırlattı ki, Ramazan, musulmanlar içün büyük sınavı ile keçti.

"Bu Ramazan ayı, beden içün qolay keçti, amma göñül içün zor, çünki ahır zaman keleyatqan vaqıtta yaşağanımıznı bilemiz. Ve bu ay içinde Qırımda öldürüvlerni, israil akimiyetiniñ tecavuziy areketlerni, Al-Aksa caimisine istilâsını kördik. Bunı körip dayanması  zor, amma İslâm ümmetiniñ ıntıluvları büyük, Allahua ibadet etüvidir. Oña köre, bu yolunda  böyle sınavlar ve acılar rastkele", - tarif etti Ayder Rustemov.

Qırımdan köçüci Zevri Kurtbedinov tarif etkeni kibi, Ramazan ayı - quvanç ve işançnen tolu bayramıdır.

"Ramazan aynı ep bekleymiz, er yıl quvançnen qarşılaymız. Menimnen balalar içün pek yahşı, belki o orazaña bağlı, belki de keyfim öyle işte. Amma Ramazan aynıñ emiyetini ruh tarafından tasvir etip olamazsıñ. Amma menimnen is etilgen quvançnen baht-seadet musulmanlarnıñ episinen duyulsıñ dep isteyim. Qırımdaki dindeşlerime, tuvğanlarıma ruhtan tüşmemesini tileyim. Apiste bulunğan dindeşlerime qaviy ruh ve sabır tilemege isteyim. Biz olarğa qol tutamız, eñ esası- olarnı Alla saqlay, bizni iç bir vaqıt terk etmey ve biz er alda ñalebe qazanacağımız", - qayd etti Kurtbedinov.

Duadan soñ imanlılar bir-birini hayırlap ve sıylap balalarğa bahşışlar bereler. 

Siyasiy mabus İsmail Ramazanov, Oraza bayramınıñ Qırımdaki qayd etüvi nasıl keçkenini hatırlavlarnen paylaştı.

"Qırımda bulunırken, bu muqaddes ayda, ilk nevbette, balalarnı hayırlamağa tırışa edik. Er bayram, balalar içün bayram azırlamaq içün dostlarımnen toplana edik. Er kes elinden kelgenini yapa edi, sofra qoya, lezetli aş pişire, batutlarnı kiralay edi. Ve, tek musulmanlar degil, bu kününi beraber  qayd etmek içün musulman olmağanları da kele edi".

Daa İsmail, apiste bulunırken oraza tutıp  Oraza bayramını nasıl qayd etkenini tarif etti.

"Men, Aqmescitniñ taqiqat tevqifhanesinde bulunaraq, er siyasiy mabusı ve vatandaşımıznıñ er biri bulunuvınıñ ağır  vaziyetlerine  baqmadan orazanı nasıl tutqanları aqılımda. Aqmescit taqiqat tevqifhanesinde bulunğanımızğa köre, soy-soplarımız bizge azıq mallarnı alıp ketire ediler,  belki, olarnıñ sayesinde orazanı tutıp oldıq. Çünki apiste berilgen "aş" musulman yemeklerine uymay. Onıñ içinde domuz eti bar. Odama kirgen mışıq bile bunı aşamay edi! Siyasiy mabuslarnıñ birdemligini hatırlayım. Ramazan ayında bir-birine tatlılıqlarnı, şekerlemelerni alıp bermege tırışa edik".