İşğalci FSB-niñ malümatına köre, Yesipenko Qırımda yaşayış ve insanlar toplaşqan yerlerniñ foto ve videolarını çıqarğan. 

“Esipenko V. L. Ukraina mahsus hızmetleriniñ menfaatları içün malümat toplağanı sebebinden tutuldı, onıñ şahsiy maşnası baqılğanda yasama patlayıcı maddeniñ tış alâmetlerinen alet belli etilip musadere etildi”, - dep haber etti FSB.

Qayd etile ki, “Serbest Avropa radiosı/Azatlıq Radiosı”nıñ prezidenti Ceymi Flay, işğal etilgen Qırımda frilanser Vladislav Yesipenkonıñ tevqifini takbih etti.

"Ukrain jurnalisti Vladislav Yesipenkonıñ tutulmasından raatsızmız. O deral azat etilmek kerek", - dedi Flay. 

Qırım uquq qoruyıcı gruppası bildirgeni kibi, Rusiye akimeiti Yesipenkonı azat etmek kerek, halqara cemiyeti ve Ukraina ise -Yesipenkonıñ bulunğan yeri , alı aqqında malümatnı talap etip oña advokatlarnı yibermek kerek.

 
Vladislav Yesipenko

“Şimdi Ukraina vatandaşı Vladislav Yesipenko imaye  aqqıdan marum etilgen, çünki oña mustaqil advokatlarnı yibermeyler. Bunıñ yerine Yesipenkoğa, onıñ razılığını almayıp, Ukraina vatandaşalrına qarşı siyasiy esaslı davalarında bir qaç sefer bulunğan advokat Violetta Sineglazova tayin etilgen edi, aqiqaten qoruğanı degil, tahqiqat meraqları imaye etilgenler”, - dep yazıla beyanatta. 

Uquq qoruyıcılar da halqara cemiyetini, işğal etilgen Qırımda ukrain faallerniñ siyasiy  taqip etüvlerni takbih etip, Rusiyege qarşı sanktsiyalarnı quvetleştirmege çağıralar.

Emil Kürbedinov Suspilne Qırımğa bildirgenine köre, onı tevqif etilgen Vladislav Yesipenkoğa olğanına kirsetmegenler.

“FSB tahqiqatçısı, Yesipenko meni inkâr etti, onı asıl da körmedim. Cuma künü onen körüşmege tarşqan edim, çeşit-türlü sebeplerden meni kirsetmediler, bazarertesi künü ise meni red etkeni aqqında bildirdiler”,- dedi Kürbedinov.

Qayd etkeni kibi, Yesipenkonıñ ömür arqadaşınen añlaşma tizgen, o, onıñ qorumasını etmege rica etken edi.

“Arizanıñ yazma şeklinde kopiyanı bekleyim, yani bazar ertesi kününden berli onıñ advokatı degilim, FSB hadimlerine inansaq, böyle ariza olğanını dep tüşünem”, - dep yekün çekti advokat.

Bundan da ğayrı, Kürbedinov emin ki, Vladislav Yesipenkodan arizası basqı ile alınğan edi. 

QMC prokuraturası, ukrain uquq qoruyıcılarnen, işğal etilgen Qırımda Vladislav Yesipenkonıñ tevqifi boyunca cinaiy davasınıñ açıluvı aqqında bildire.

“Muhtariyet prokuraturasınıñ dava reberligi astında, vaqtınca işğal etilgen yarımada territoriyasında Azatlıq Radiosı hadiminiñ qanunsız tarzda azatlıqtan marum etüvine köre cinaiy davası açılğan. İşğalcı “uquq qoruyıcılarnıñ” areketleri Ukraina CK 146 m. 2 q. (azatlıqtan qanunsız sürette marum etüvi) köre hasiyetlenilgen ediler”, - dep yazıla idareniñ beyanatında. 

Nyü-Yorktaki jurnalistlerniñ qoruv komiteti (JQK), Azatlıq Radiosınıñ ştattan tış hadimi Vladislav Yesipenkonıñ acele azat etilmesini talap ete.

Bunıñ aqqında, aqşam  saban aynıñ 18 yayınlandırılğan teşkilâtnıñ arizasında denile.

"Rusiye akimiyeti, jurnalist Vladislav Yesipenkonı deral azat etmek, ondan sahte kabaatlarnı çıqarıp qırım jurnalistlerniñ taqip etüvlerni ve qorqutuvlarnı toqtatmaq kerek",- qayd etti Avropa ve Merkeziy Asiyadaki JQK programmasınıñ koordinatorı Gülnoza Said.

O qayd etkeni kibi, oña qarşı qabaatlavlar  sahte olıp yerli matbuatnı qorqutmağa çağırığanlar.  

Bundan ğayr saban ayınıñ 18-nde "Krım24" işğal telekanalı Vladislav Yesipenko ile intervyü yayınladı. Onen telekanalnıñ baş prodüsseri Oleg Krükov subetleşti. Saytta yayınlanğan videoda Yesipenko, yarımadada Qırım.Aqiqat içün çekişler yapqanını ve soñra Ukraina mahsus hızmetleri içün de bu malümatnı bergenini tasdıqlay. 

Yesipenkonıñ ömür arqadaşı Katerina işğalcılerniñ aqayı ile intervyüsi "urulmalar, iskenceler neticesi", dep saya.  

“Aqayımnıñ sağlığı ve ömüri içün qorqqanım ilk sefer degil, em de tünevinki videosından soñ. Bu video, uruvlarnıñ, azaplarnıñ ve adam üzerinde qılınuvlarnıñ nevbetteki isbatıdır”,- qayd etti Yesipenkonıñ ömür arqadaşı. 

Bundan da ğayrı, Yekaterina Yesipenko tarif etkeni kibi, tevqifniñ altıncı kününe onıñ ömür arqadaşı telefon etken.

“Vlad salı künü telefon etken, o, tevqif etüviniñ 6 künü edi...Tek içtimaiy mevzularğa laf ete bilgenini ihtar etken, ne içündir baştan añlamadım… “Seni urğan ediler mi?” dep sordım. Bu sualge cevap berip olamağanını aytqan”,-qayd etti o. 

“Jurnalistniñ azat etüvinde bizge yardım ete bilgen er kesge muracaat etmege isteyim - Ukraina prezidenti, ombudsmen, TİN, halqara teşkilâtlarğa. Yardım ete bilgen er kesni rica etem”,-yekün çekti qanunsız sürette tevqif etilgen Yesipenkonıñ ömür arqadaşı.

Vladislav Yesipenko, Yekaterina Yesipenko

Fizinomist Tatyana Larina Suspilne Qırımğa tefsirde, işğalciler Yesipenkonı küç küllenıp itiraf etmege mecbur ettkenlerini ayttı.

"Videonıñ 40-ncı saniyesinde, ne içün onı yaqaladılar, sualge biraz külümsirep cevaplana. Böyle, insan aytqan malümatına sayğısız davranğanda ola. Yani insan bir şeyni gizlemege tırışqanda. İnsan külümsirey, amma onı köstermemege tırışa.Ya da nefret peyda ola. Bu aselet degil, aytmağa istemegenimizni aytqanda böyle ola", - dedi Larina. 

Onıñ sözlerine köre, Yesipenko sanki evelden azırlanğan sözlernen suallerge cevaplana.