Edem Semedlâyev, Aqmescitte orta küz aynıñ 25 Qırım arbiy garnizon makemesi yanında tutıp alınğan insanlarğa uquqiy yardımını bermek içün kelgen. Yardım etken vaqıtta “E” merkeziniñ hadimleri Edem Semedlâyevni protokolnıñ yazılması içün olarnen keçmege rica ettiler. Semedlâyev, bu adamnıñ advokatı bar olğanına olarnıñ diqqatını celp etti. Bundan soñ Edem Semedlâyev, hadimlerniñ qanunsız areketlerni qayd etmege istegeni aqqında haber etti. Vekâletli Ruslan Şambazov ise foto ve video qayd etüvini keçirmege yasaq etkenini bildirdi. Edem Semedlâyev, ne foto ne de video qayd etüvini yapmadı ve tek ses qayd etilmesi aqqında söz ketkenini  bildirdi. Bundan soñ Şambazov Semedlâyevni tutıp alğan soñ, onu ayrı odağa alıp ketirgen. Şambazov, eki adamnı ve bir polis hadimini davet etip advokat Semedlâyevni soyunmağa rica etti. Semedlâyev red etti, amma üst urbanı çıqarıp ceplerden er şeyni çıqardı. Edem Semedlâyevniñ adına eki memuriy protokolnı yazdılar, ekisi de “polis hadimlerine boysunmamazlığı” sebebinden. Baştan rusiye polisleri onı foto ve video qayd etilmesinde qabaatladılar, soñra ise advikattan soyunmasını talap ettiler. Qırımdaki advokat palatasına muracaatında böyle ameliyat, “advokatura itibarınıñ aşalavına yöneliş tuta” dep bildirdi. Orta küz aynıñ 25-26 advokat, Suvdağ şeerdeki vaqtınca tutuv taqiqat tevqifhanesinde geceley edi. Ondan evel tutıp alınğan 21 şahıs da geceni taqiqat tevqifhanesinde keçirgen. 

Kelecek künü makeme oturışı beklenile edi, em de Semedlâyevniñ eki protokolı boyunca. Lâkin aqşam orta küz aynıñ 26 Edem Semedlâyevniñ adına yazılğan eki orotokolnı makeme, teşkerüv devirinde yahşı etip işlevi içün poliske qaytarğan. “Onıñ yazılğan vaqıtta yapılğan çoq sayılı bozuluvları sebebinden oldı. Makemeci, protokolnıñ yazılğan vaqıtta polis hadiminen yapılğan bozuluvlarnı tafsilâtlıca yazğan. Bunen beraber öz işseşine uquqiy yardımını bergen vaqıtta şahsen qayd etilgen bozuluvlar da. Yani yazuv ve malümatlarnıñ baquv  keyfiyetine ve şahısnıñ celp etilmesine eki baa qoyam. Polis hadimlerniñ öz işine böyle munasebeti pek fena. Memuriy protoklnı esassız  alıp yazamazsıñ”, - tefsir etken edi advokat Aydet Azamatov. Semedlâyevniñ işdeşleri de daa bir kere yahşı etip işlemesi içün qaytarılğan protokollar makemege ekinci sefer kelmezler dep emin ediler. 2021 senesi qasım aynıñ 12 onı “E” merkezine çağırdılar. Aynı künde nevbetteki makeme oturışı ötkerilgen. Neticede advokat Edem Semedlâyevni Aqmescitteki merkeziy rayon makemesi, RF CK 19.3 maddesi boyunca “E” bölüginiñ reberi Ruslan Şambazovnıñ ses qayd etmesini toqtamağa talabına red etüvi içün 12 künge tevqif ettiler. Keççe Aqmescit makemesi, Semedlâyevge RF CK 19.3 başqa protokolına köre soyunmağa red etüvi içün 4 biñ ruble miqdarında memuriy cöremeni tayin etti. Makeme kollegiyası, Edem Semedlâyevni, polis hadimleriniñ qanuniy talaplarına boysunmamazlığı aqqında maddesi boyunca ekinci qanun bozuluvında qabaatlı dep tanığan.

Qasım aynıñ 23 Semedlâyev, vaqtınca tutuv taqiqat tevqifhanesinden çıqtı. Onı taqiqat tevqifhanesinde bir qaç sefer ziyaret etken onıñ işdeşi, Emil Kurbedinov, onıñ zenaatdaşı, cinaiy maddesi boyunca cinayetni yapqan insanlarnıñ tutuvı içün cezahanesinde bulunğanı aqqında qayd etken edi.  Advokat, memuriy soyu boyunca mahküm etilgenine baqmadan. Cezahanesinden advokatnıñ çıqısınıñ bir qaç daqiqa evel rusiye quvetçileri “halq qoruyıcısını” qarşılamağa kelgen insanlarnı tutıp almağa başladılar. Aynı böyle serlevasınen içtimaiy ağlarda fleşmob keçken. İnsanlar saifelerde Semedlâyevnen yañı resimlerni paylaşa ediler. Netice olaraq, 31 insan tutıp alınğan edi: olardan dört grajdan jurnalisti ve on qadın, olarsan üçü, vaqtınca tutuv cezahanesinde geceley edi. Tutıp alınğanları üzerinde nevbetteki oturışlar qasım aynıñ 24 beklenileler. Onıñ serbest etüvinden bir qaç saat soñ, Semedlâyev, polis bölügine qaytqan: anda tutıp alınğan insanlarğa uquqiy yardımını berecegini dep añlattı.