İçtimaiy Qırımğa tefsirinde yırcı şunı haber etti ki, “sevgi, hainlik ve özüni qorçalamağa qabiliyeti aqqında türküni taqdım etmesine pek  hoşnutım”. 

Bu türkü, insanlarnıñ yüreginde cevap alacağına ümüt ete. Yırnıñ eki versiyası bar: “Страва з перцем” ukrain tilinde ve türkçe. 

“Türk aytılışı üzerinde uzun vaqıt içinde çalışa edim, İstanbulğa Erhan Beyge uçıp kele edim ve o şahsen tüzete edi. Tillerimiz oşay dep sayamız, amma yoq. Türkü metinlerniñ hususiyetleri aqqında tarif etken. Metinlerde aqaylarnı fena tarafından köstermege olarğa has degil”,- qayd etti Batalova. 

Menba: Elzara Batalova (ses yazuv studiyası)

Daa yırcı, Erhan Güleryüznen icadiy tandemi nasıl olıp keçkenini tarif etti.  

“Türkiyedeki müellifni qıdıra edim. Zenaatdaşım Erhan Beyni tevsiye etken. Onıñ eserlerini araştırıp baqtım, o ise - menimkilerni. Bundan ise Erhan Beynen maña büyük memnüniyetnen bağışlanılğan şiiri peyda olğan. Onıñ studiyası Taksimde bulunmaqtadır, anda yazıcılar, rejissörlar, sanatkârlar keleler. Fikirdeşlerniñ körüşken yeri. O, qapını er kesge açmağan yıldızıdır”,- tarif etti Elzara Batalova. 

Bundan da ğayrı qayd etkeni kibi, olarnıñ öz zihniyeti bar ve çalğıcı, biraz feministik körülgen metinini eşitkende şaşıp qalğan. 

“Zenaatdaşlarıma ve diñleyicilerime teşekkürler bildirem. Türküm, sizge quvanç ve ilham alıp ketirecegine ümüt etem. Sergey Krutsenko, klip üzerinde işini bitire, onı menim Elzara YouTube-kanalımda körmek mümkün olacaq”,- yekün çekti yırcı. 

Menba:Elzara Batalova (klip çekimleri)