Ukraina halqını selâmlayım! Men, Kremlniñ siyasiy mabusı, Umerov Şaban İzetoviç, Üzbekistan SŞC Taşkent vilâyetiniñ Angren ş. doğdım. Uzaq 1944 senesi anda Qırımdan bütün halqım sürgün etilgen edi.

Uzun yıllar devamında sürgünlikte bulunaraq, qırım musulmanlar olar hainler olmağanını isbatlaraq barışıq yolunen vatanğa qaytmağa tırışa ediler. 1986 senesi razılıq alıp halq qaytmağa başlağan, men de 1990 senesi orduda hızmetten soñ Qırımğa keldim.

Soñ ŞSCB inqirazı olğan, belki de, ukrain ve qırımtatar halqını quvandırdı. Qırım Ukraina terkibine kirgen. Er şey, orta Adiyada evlerimizni qalfırıp tarihiy vatanğa, boş topraqqa kelgende olğan. Para kâğıtqa çevirilgen, amma halqım işançını coymağan, çalışıp abadanlaştırıla edi. O vaqıt Qırımda yaşağan halqımnen beraber areket ete edim. 

1992 senesi ömür arqadaşımnen tanış oldım ve uzun muddetke qaldırmayıp onnen aile qurdıq. 1993 senesi oğlumız, soñra eki qızımız doğğan: 1996 senesi - büyük qızımız ve 2004 senesi kiçik soyumız. Baştan Colman köyünde yaşay edik, soñra Aqmescit rayondaki Çoyunçı köyüna köçip keldik ve soñra Kamenka bağçalarında arazini satın aldım, anda ise bütün şaraitlernen evimizni qurdıq.

Bütün bu vaqıt içinde iç bir mesele olmağan edi. Qırımğa kelip, musulman olaraq öz dinini ögrenip oña köre yaşamağa başladım. Din, soy-soplar ve qomşularımnen bağ tuttırğanına köre, cemiyette faal ömürni keçire edim. İnsanlarnıñ meseleleri olsa edi, olarnen beraber çezmege yardım etmege tırışa edim. 

Umumen, ömür kerek olğanı kibi keçe edi. Kamenkada yaşağanda adamlarnıñ çoqusınen tanış olıp dostlaştım. Olar da cemiyette faal insanlar ediler. Bu vilâyette balalar içün bayramlarını nasıl keçirgenimiz misallerden birini alıp ketirmege ister edim. Bu bayramğa farqlı milletleriniñ balaları kele edi ve olarnıñ arasında farqını kimse qayd etmedi. Bedava yemek, attraktsion, yarış, içimlikler bar edi.

Amma 2014 senesi, bilgeniñiz kibi, halqımızğa qadevet isettirgeni olıp keçti. Qırım, Rusiyenen işğal etilgen edi ve ukrain Qırımında olğan bütün bu tınçlıq, Rusiyeniñ kelüvinen yoq etilgen. Menimce, Ukrainağa da çoq dert ketirgen. Amma olğanı olğan. Qırım, RF’nen işğal etilgen ve faal ömür tarzını keçirgenleri şimdi RF apishanelerinde ve lagerlerinde bulunalar.

Qırımda tahqiqat astında bulunaraq, sıq rus tilinde laf etkenlerinen otura edim ve olarğa sualler qoya edim. Qırım, Rusiyenen işğal etilgeni sebebinden çoqusınıñ kederligi körüne edi. Çoqusı, vaqialarnıñ böyle inkişafını beklemey edi. Amma biz, qırım musulmanlar, daa 1783 ve 1944 senelerdeki vaqialarına köre 2014 senesi nasıl bitecegini añlay edik. Apishanelerde siyasiy mabuslarınıñ vaziyeti farqlı tarzda teşkil ola: çoqusınıñ sağlıq meseleleri peyda ola. Amma ukrain halqını inandırmağa isteyim ki, Tañrı, aqiqat kelgen vaqıtta yalannı yoq ete. Ve niayet, er şey yahşı tarafqa deñişecek. Sağlıqnen qal, ukrain halqım! 

*metinniñ muellif üslübi ve imlâsı saqlanılğan