Selâm aleyküm! Adım Remzi. Milletim qırımtatardır, dinime köre, musulmanım. Qırım birdemligi birleşmesiniñ grajdan jurnalisti olam. Öz faaliyetim, zaneaatım ve mevamım sebebeinden menden ğayrı, 100 adam kibi Kremlniñ mabusı olam. Bugün aqiqat boyunca makemelerim keçe. Qabaatsız dep tanuv ükümlerine ümüt beslegen insan az. Aşhanede farqlı siyasiy mevzularına laflar içün 15 yıl müddetinden  ömürlik apis cezası  meni bekley! Başqa tarzda tüşüngenlerini ve sahte terroristligini rusiye akimiyeti böyle yeñe. 

Er şey böyle başlanğan edi. Adiy köy mektebiniñ bitüvinden soñ, 2002 senesi V.İ. Vernadskiy adına Tafriya Milliy Universitetiniñ tarihiy fakultetine kirdim. Fenimni begene edim, ayrıca, ösken ve yaşağan yerimniñ tarihını. Tarih fakultetiniñ bitüvinden soñ, Qırım boyunca qılavuz olaraq çalışqan edim. Oquşımnen aynı zamandaoz ömür arqadaşım Halidenen tanış oldım. O da, men  dayın TMU informatika ocasına oquy edi. Bu alçaq göñülli qıznı pek begendim ve onen evlenmege qarar berdim. Toydan soñ Aqmescitke yaqın olğan  qurucılığını bitirmegen evimizge köçip keldik ve anda öz kelecek ayatımıznı abadanlaştırmağa başladıq. O vaqıt iqtisadiy devri, pek qıyın edi, amma sevgi, bir birini añlav ve sabr öz mahsullarnı bergenler. Soñ ailemizde balalar peyda oldı. Şimdi üç balam bar - eki oğlan (10 ve 12 yaşında) ve qızım Safiye (7 yaşında). Aile yaşayışından unutılmaz anlerinden biri - tonğuçnıñ doğuvıdır. Öz evlâdını eline alğanda duyğularnı añlatıp olamazsıñ! Birinci oğlum Muhammad, maña pek oşay. 

Ailemnen beraber köyde öz yaşayışnı dostlarım Osman Arifmemetov, Ruslan Suleymanov ve başqaları abadanlaştıra ediler. Universitette oquğan vaqıtta yataqhaneniñ bir odasında yaşay edik. Beraber qurula edik, qoranta saipler olğan edik. Beraber oturamız da. Qırımtatarlar - musulmanlardır, onıñ içün, halqımıznıñ qısmı olaraq, öz tarihı, medeniyet, dinnen meraqlanmağa başladıq. Episi bu, meni İslam dinimniñ daa teren tetqiq etüvine ketirgen. Bu din, Yekâne Tañrığa tapınmağa, ana-babalarnen, soy-soplarnen yahşı munasebetlerde bulunmağa, büyüklerge ürmet etmege ve ihtiyac körgenlerge yardım etmege ögrete. Dostlarımnen er cuma cuma namazına qatnay edik, köyümizni abadanlaştırmağa yardım etken edik, köy sakinler içün (birinciden, balalar içün) islam bayramlarını teşkil etken edik. 2014 senesine qadar yaşayışımız tınç edi. Qırımnıñ Rusiye terkibine kirüvinden soñ*, yaşayışımız bam-başqa oldı! Tek menimki degil, amma biñlerce başqa qırımtatar ailesiniñ de. Tintüvler, tevqifler, tutıp esir etüvleri, işkenceler, memuriy cöremeler - bu ve başqa şeyler, qırım aqiqatımız olğanlar. 

Aman-aman er kün, “Musafirligimizge kimse kelmedimi?” dep  azbarğa baqa edik. Soñra ise “Quvetçiler, tanışlarım, dostlarım ve qomşularıma kelmedilermi?” sualinen içtimaiy ağlarnıñ saifelerni çevire edik. Yañı qırım aqiqatı, halqnıñ imayesine turıp olğan cesur insanlarnı talap etken edi. Ve birinciden, qırımtatar halqnıñ imayesine, çünki esasen aynı o, olıp keçken aqiqatını qabul etmegen. Qırımtatar halqı, “referendumda”, RF akimiyetiniñ devlet organlarına saylavlarında iştirak etmegen edi. Bu sebepten, rusiye akimiyeti, onı cezalandırmağa qarar bergen.

Repressiyalarğa qarşı nasıl tura bilemiz dep tüşünip dostlarımıznen dissident ecatlarımıznıñ, 1944 senedeki deşetli stalin sürgünlikten soñ 60-90 seneleri tınç yolunen Qırımğa öz tarihiy Vatanına halqnıñ qaytuvı oğrunda küreşken qırımtatar faallerniñ tecribesine riayet etmege qarar berdik. Başqa oğlanlarnen beraber tintüvler, makeme yerlerine kelmege başladım. Smartfonlarımız ile Qırımda olıp keçeyatqan vaqialarnı yayınlay edik: tevqifler, tintüvler, tutuvlarnı. Bütün mütehassıs KHV, quvetçilerniñ basqısı astında yarımadanı terk etmege mecbur ediler, buna köre, Qırımda olıp keçken qanunsızlığını yayınlandırmağa rolüni özüme aldım. Bu sebepten, bir qaç sefer taqip etüvlerine oğratılğan edim, uydurılğan maddelerine köre eki kere mahsus qabul hanesinde oturğan edim, yani “insan olsa edi - maddesi ise ille tapılır”. 

2019 senesi saban aynıñ 25 Rostov-na-Donudaki şeerine yol tutqan edim. Rostovğa kelmeden quvetçiler meni ve eki dostumnı qırsızladılar. Rostovdaki trassalarnıñ birinde orman yolağında bizni pek urdılar. Uruv, aynı zamanda küfür sözler ve beden qılınuvınen olğan edi. Qara kiyimlerinde insanlar meni ve dostlarımnı gazelge atıp urulğan alda Qırım FTH’ne alıp ketirdiler, anda ise üçümizge, keççe belli olğanı kibi 29 insanğa dair cinaiy davanı açtılar. Meni ve dostlarımnı, Qırım birdemliginiñ faallerini Hizb-ut-Tahrir terroristik teşkilâtınıñ faaliyetiniñ teşkil etilmesinde qabaatlaylar. 2014 senesinden soñ Qırımda FTH peyda ola, ondan soñ ise yüzlerce cinaiy işi sahtelenile. Cinaiy işimiz olardan biridir. 

Taqiqat tevqifhanesindeki yaşayış, serbestlikten farqlanıla. Mında öz qaideler ve tarzıları bar. İnsan, er şeyge alışır. Tek bir şey quvandıra - öldürüv, yağmacılıq ya da namusına keçüv içün oturmaysıñ - öz faalik, diñ sebebinden oturasıñ! Aynı bu, mında tikenli teli artında yaşayışını qolaylaştıra. Serbestlikten berilgen insanlarnıñ destegi bizni, siyasiy mabuslarını pek isite. O, faallernen aşayt mallarnıñ alıp berilmesi, bütün dünyadan kelgen destek mektüpleri ve biñlerce insannı biz içün acetleri. Ailelerimiz ve balalarımız qasevetsiz qalmadı. Biz kibi, halqnıñ vasiyligi astında bulunalar! Bugün, Allağa işanıp bir kere adaletsizliginen başlanılğan küreşini devam etip vaziyetniñ deñişüvine ve birdemligiñizge ümüt etem. 

Din mabusı, Remzi Bekirov.

*metinniñ üslübi ve imlâsı, müellif soyuna köre saqlanılğa